GAPS

Lífsmark

2010-08-10T22:25:00.002Z

Ég er ekki hætt!

Bara rosalega upptekin - barnaafmæli nýafstaðið, miklir flutningar yfirstandandi... mataræðið allt í rugli en ég er nú samt alveg innan GAPS-rammans... bara ekki alveg fókuseruð á uppbyggilega meðferð og það allt...

... tók myndir af barnaafmæliskrásum. Pósta á morgun... eða mjög fljótlega. Takk fyrir að nenna enn að kíkja inn á þessa síðu!

Bloggið gírað niður

2010-08-05T22:45:00.003Z

Vitiði... eins og ég legg mig fram við þetta blogg og reyni að vera skýr, nákvæm, upplýsandi og svo framvegis, þá held ég að ég verði bara að gera smá pass núna.

Ég hef innan við 4 vikur þar til ég þarf að vera flutt út úr núverandi íbúð og inn í aðra sem ég er ekki búin að finna og meiningin er að hún verði í Noregi, þar á ofan. Ég þarf að pakka, skipta búslóð, ganga frá skilnaði að borði og sæng, flytja, redda plöggum og pappírum, elda eins og vindurinn, ganga frá ótal lausum endum og svo framvegis og svo framvegis. Þess má líka geta að ég er að undirbúa GAPS-barnaafmæli um helgina, með öllu sem því tilheyrir (t.d. endalausar hnetur, möndlur og fræ á ýmsum stigum bleytis og þurrkunar...)

Ég er enn frekar slöpp og sólarhringurinn er einfaldlega of stuttur fyrir þetta allt - held þess vegna að ég verði einfaldlega að leyfa mér að raða þessu bloggi aðeins aftar í forgangsröðina en það hefur verið.

Það gæti þýtt að færslur verða strjálari og bloggreynsla mín segir mér líka að heimsóknum fækkar í samræmi við þannig... sem er alltaf dálítið sorglegt, en þannig er víst lífið stundum ;-)

Í mjög stuttu máli halda tilraunir með nýjungar áfram.

Í ljós hefur komið að hvorki ég né eldri stelpan þolum graflaxinn mjög vel, né heldur safann úr fáeinum nýtíndum kræki- og bláberjum.

Hins vegar kom gulrótarsafinn vel út, sem og bætiefnin öll sömul.

Nýjasta nýtt er... haldið ykkur fast... hrá lifur. Já, ég er ekkert að djóka, sko, ég og Hannibal Lecter erum komin á sama plan. Læt ykkur vita þegar ég get eitthvað sagt til um árangurinn af einhverri vissu.

Bað dagsins er óðum að fyllast, ætla að smella mér í það og svo að SOFA.

Nýjungar í hrönnum...

2010-08-03T23:27:00.002Z

Jæja, nú fer þetta að verða flókið. Þar sem við erum allar að renna inn í sams konar fæðisáherslu (sem til upprifjunar er fjölbreytt fæði en lítið um sætindi og hnetur) finnst mér að ég verði nú að innlima skrif um þá yngstu okkar inn í þessa skráningu alla. Að auki eru nýjungar að bætast við í hrönnum og allt utanumhald semsagt að verða flóknara á sama tíma og ég hef minni og minni tíma, enda að fara að flytja úr landi eftir aðeins 4 vikur.

Sem dæmi má nefna að þetta eru bætiefni sem ég hef verið að byrja á en skortir skipulag til að nota reglubundið og fyrir okkur allar:

BioKult (próbíótísk bætiefni)
Betaine HCl (meltingarensím)
Hampolía (Ómega fitusýrur)
Udo's 3-6-9 (Ómega fitusýrur)
Blue Ice gerjað lýsi (Ómega fitusýrur, D-vítamín og svo margt fleira!)
Súrkálssafi (próbíótísk virkni)
Kókosolía (fitusýrur og hreinsandi virkni)

... ég kemst bara hreinlega ekki yfir þetta allt. Byrjaði í dag að krota á blað hvað hver okkar fékk... en komst svo sem ekki yfir margt.

Við fengum allar smá Betaine og BioKult. Þær fúlsa við hylkjum en elska báðar BioKult á tunguna en finnst meltingarensímin hins vegar mesta óæti. Sú eldri svælir þeim þó í sig ef þeim er hellt út í vatn.

Sú yngri elskar kókosolíuna en sú eldri kúgast af henni - dæmið snýst svo við þegar súrkálssafi er annars vegar... og svona er þetta upp og ofan, nenni ekki að fara í allt.

Mér finnst olíurnar ógeð en það kemur mér á óvart hvað fyrirbærið með ólystuga heitinu gerjað lýsi er lítið vont... ekki beint gott, en mun betra þó en t.d. jurtaolíurnar (nema kókosolían, hún er góð en rotar mig).

Ég var minna hress í dag en í gær, en meira hress en suma daga þar á undan.

Hægðir fjölskyldunnar eftir atvikum, fínar hjá litlu, sæmilegar (dálítið blandaðar) hjá þeirri eldri og eh... fjarverandi hjá mér (pent orðað?).

En já, nú er baðið mitt farið að bíða og best að hespa einhverri matarskráningu af.

Matseðillinn

Morgunmatur minn: Rest af foldaldafillé gærkvöldsins, með tilheyrandi grænmeti og graskeri

Morgunmatur barnanna: Graskersbrauð (bakað seint í gærkvöldi) og sú yngri fékk venjulegt lífrænt smjör á brauðið

Hádegismatur minn og þeirrar yngri: Hjallaþurrkaður steinbítur

Hádegismatur eldri dóttur minnar: Lambahakkskássa (frá því fyrir útlandaferð, var í frysti)

Síðdegisverður minn og eldri dóttur minnar: Óreyktar, aukaefnalausar Kjötpólspylsur án skinns (eftir því sem við gátum náð því af, gekk ekki alveg jafn vel og í gær). Meðlæti: linsoðið egg og smá graskersmauk

Síðdegisverður yngri: Linsoðið egg, banani, graskersbrauð með lífrænu smjöri

Kvöldmatur: Ofnbakaður (já, -bakaður, ekki -soðinn!) lax með fersku dilli, soðnar gulrætur, graskersmauk (fyrir mig) og lárperumauk (fyrir þær).

Eftirréttur: Graflax

Kjötsoð: Lambakjötssoð

Böð: Eldri dóttir mín fór í Epsombað í morgun og var eftir það fín í húðinni, en fór svo að klæja þegar á leið og fékk matarsótabað undir kvöldið. Ég er að fara í bað núna og held að ég fái mér sóta... þó að mér líði alltaf best eftir Epsombaðið. En það er víst mikilvægt að skipta og breyta til, rótera dálítið.

Dásemdardagur

2010-08-03T00:05:00.002Z

Ókey, það er komið fram yfir miðnætti á þessum góða degi - þeim fyrsta í langan tíma þar sem ég hef fundið áþreifanlega fyrir aukinni orku. Tek fram að ég var enginn spútnik, var ekkert á útopnu að springa úr orku og svo framvegis... en fann klárlega minna til svimandi þreytu og slappleika og átti auðveldara með að halda mér að verki.

Get náttúrlega ekki bent á neitt eitt sem orsök, allt helst þetta jú í hendur. Mun samt fylgjast með bæði steinbítnum og Omega olíunni... fannst eins og hvoru tveggja hjálpaði alveg sérstaklega.

Svo er ég svo glöð eftir að hafa í kvöld talað við konu sem er í meistaranámi í náttúruheilsufræðum í Sviss og hún studdi einhvern veginn bara allt sem ég er að gera og bakkaði upp með enn frekari fræðaþekkingu. Svo ljómó... þegar konu finnst hún stundum vera alein í þessum forfallna lækna- og lyfjadýrkunarheimi.

Nýjungar dagsins:

Óreyktar, aukaefnalausar pylsur (flysjaði ,,skinnið" af, til öryggis)
Fersk gúrka, afhýdd og með smá eplaediki
Omega olía (fyrir mig)
Súrkálssafi - kannski ekki alveg nýjung... en tel hann samt upp hér með öðru

Gleymdi líka að segja frá því í gær að ég er að taka Betaine HCl með máltíðum. Það hjálpar pottþétt. Dætur mínar fengu líka smá þannig fyrir morgunmatinn í morgun.

Matseðillinn

Morgunmatur: Linsoðin egg, smjörsvissaður laukur og pylsur (ég fékk mér líka smá soðið grænmeti frá því í gær)

Hádegismatur eldra barnsins: Kássa

Hádegismatur minn: Hjallaþurrkaður steinbítur

Hádegismatur yngra barnsins: Banani, hnetubrauð með venjulegu, lífrænu smjöri, smá steinbítur

Kvöldmatur: Pönnusoðið /-steikt hrossakjöt með lárperumauki, ferskri gúrku og soðinni papriku + gulrótum.

Að auki fengu börnin að smakka smá grasker í kvöld (ég var að gera brauð) og sú styttri borðaði smá blæjuber á milli mála og báðar vildu ólmar frá BioKult beint í munninn og fannst það rosa gott. Gaf þeim þó bara hálft hylki hvorri.

Svo brá ég mér frá í kvöld en pabbi og mamma voru að passa og þau sögðu mér að sú eldri hefði kvartað undan magaverkjum þegar hún var komin upp í. Veit ekki meira um það, en staldra að sjálfsögðu aðeins við það, í ljósi nýjunganna. E.t.v. er ég að fara of hratt með hana...? Ansans, mig sem langaði svo í blautan berjamó á morgun... ;-)

Steingleymdi böðum í dag / kvöld. Veit ekkert hvað kom yfir mig. En pottþétt böð á morgun.

Soð dagsins: Lambakjötssoð.

Breytingar (54 dagar frá upphafi inngangs... sem eiginlega er búinn núna...)

2010-08-01T20:00:00.007Z

Ég á eitthvað erfitt með að hætta að telja dagana. Það er eitthvað svo kósí við svona dagatalningu.

En allavega, nú eru breytingar hafnar. Næstu skref mataræðisins eru þessi (kæra fjölskylda, vinsamlegast kynna sér vel):

GAPS-fæði með sætuefnum (hunangi, ávöxtum, berjum, gulrótum og öðru sætu), sem og hnetum og e.t.v. fræjum í lágmarki. Þetta mun eiga við okkur allar þrjár.

Markmið: Að halda heilun meltingarvegarins áfram og samtímis sporna kröftuglega gegn candida og félögum hans.

Framkvæmd: Förum frekar rólega af stað, þó að ég hafi reyndar skellt mér all hressilega út í þetta nú um helgina. Mikilvægt að geta fylgst vel með. Bætum fæðutegundum hægt við og fylgjumst vel með einkennum. Einhver stökk verða svo eflaust tekin í tengslum við afmælisveislu næstu helgi, en svo tjúnað aftur niður í rólegheit.

Er einnig að spá í undantekningu varðandi ber, tel vel hugsanlegt að kostir öflugra andoxunarefna geti vegið upp á móti hugsanlegum skaða af því að fóðra meinvirkar örverur.

En fyrir fjölskyldu og aðra þá sem þekkja okkur og eru eitthvað að díla við dætur mínar - ekki innleiða neitt nýtt nema í samráði við mig, takk.

Dætur mínar voru hjá föður sínum um helgina (þ.e.a.s. lau. og sun.) og ég get því ekki talið upp hvern matarbita sem upp í þá eldri hefur farið, en hún prófaði eftirfarandi nýjungar:

Smá meira ghee, 1 teskeið enn (í gærkvöldi). Hún elskar það.
Linsoðin egg í morgun (eða kannski bara 1? Veit ekki, var ekki hér). Hún hefur semsagt ekki fengið egg frá því a við komum heim. Höfum fókuserað á ghee-ið.
Harðfiskbita (hjallaþurrkaðan steinbít
BioKult próbíótískt bætiefni, ca 1/4 úr hylki út í vatn með matnum.

Hún var í gær búin að vera með hægðatregðu í yfir 48 klukkustundir og ég kom heim sérstaklega til að gefa henni stólpípu. Það gekk mjög illa, aldrei þessu vant. Hún var stíf, stressuð, hvumpin, ósamvinnuþýð og ergileg. Ég varð ergileg líka. Alger martraðarstólpípa, en hafðist á endanum. Stólpípa má einmitt, eðlis síns vegna, alls ekki verða að vondri upplifun. Vona að þetta sé ekki það sem koma skal!

Barnið fór svo á salernið í kvöld og tókst með smá herkjum að hafa hægðir, sem voru vissulega í mjög föstu formi. Á samt ekki að vera erfitt. Höldum áfram að fylgjast með!

Ég hef hins vegar verið mun róttækari í nýjungunum fyrir sjálfa mig. Ég var búin að vera að leita lausna og ráða, enda orðin bara einfaldlega drullulasin - og skinhoruð. Sennilega hef ég ekki verið að fá nóg af fitu og enn má betur ef duga skal. En hér á eftir veit ég smá innsýn yfir það sem ég hef verið að gera.

Fimmtudagur:

Fyrsta skrefið var tekið á fimmtudagskvöldið. Þá var ég nefnilega með eyrnasýkingu eða -bólgu sem var búin að vera að ágerast. Setti smá BioKult (próbíótísk bætiefni) aftast á tunguna á mér fyrir svefninn, með það að markmiði að láta það vinna í munnkokinu (sem tengist eyrnagöngunum) yfir nóttina.

Bjó líka til hvítlauks-olífuolíu og lét drjúpa með sprautu inn í eyrun.

Föstudagur:

Mér var bent á lifur. Fékk mér því lifur í tvenns konar formi - og gaf dætrum mínum líka.

a) Maríneraði lambalifur í sítrónusafa í smástund og ,,steikti" síðan í smá vatni í sósupotti.

b) Hakkaði lambalifur saman við lamba- og nautahakk og smá grænmeti og hvítlauk + egg

og sauð litlar bollur.

Svo fékk ég mér lárperumauk sem ég hafði ekki verið að fá mér síðan við vorum úti (í 5 daga) og setti út í það nokkra dropa af kaldpressaðri, lífrænni ólífuolíu. Það var ljómandi gott.

Um kvöldið var mér boðið í afmælisveislu. Var svo slöpp að ég þurfti nálastungu til að koma smá orkuflæði í líkamann áður en ég gat lufsast út á meðal fólks.

Í veislunni voru ljómandi girnilegir Mojito-drykkir hafðir um hönd. Ég er alveg sannfærð um að það er hægt að búa til einhvers konar GAPS útgáfu af Mohito... en það er ekki á dagskrá alveg núna. Ég var með sítrónu með mér, en notaði svo bara lime sem þarna var á boðstólum, kreisti safann út í vatn og bætti við klaka. Afmælisbarnið droppaði svo 2 jarðaberjum ofan í glasið mitt og ég var sullandi í þessu allt kvöldið - bætti af og til við vatni, límónum og klaka.

Þetta var... tjah, ágæt tilbreyting (drykkurinn, sko).

Á endanum var ég að mestu búin að borða þessi tvö jarðaber. Þeir litlu bitar og flyksur sem smygluðust upp í mig í einu voru algerlega himnesk á bragðið.

Gisti hjá systur minni, var ekki með BioKult meðferðis, en bjó til nýja ólífu-hvítlauksolíu og dreypti í eyrun.

Laugardagur:

Vaknaði við heiftarlegar meltingartruflanir. Hugsaði strax um jarðaberin, en auðvitað má vera að hinum nýjungunum hafi verið um að kenna.

Hélt þó nýjungagirninni ótrauð áfram. Fékk mér 1 linsoðið egg með lárperumauki um morguninn. Í síðustu skipti sem ég hef fengið mér egg hefur komið ólga í magann mjög skömmu síðar, en það gerðist ekki núna.

Um hádegið rölti ég inn í bæ, fór í Kolaportið og fjárfesti í feitasta hjallaþurrkaða steinbítnum sem ég fann.

Settist svo á bekk á Ingólfstorgi og hóf að gnaska í mig dökkgulan, olíulöðrandi steinbít. Veðrið var gott, ég var léttklædd, bara í kjól - engin peysa eða neitt. Fullt af túristum í bænum. Steinbíturinn syndsamlega góður. Þegar ég var búin að sitja um stund kom miðaldra dönsk kona, túristi, og settist á bekkinn hjá mér. Hún fékk sér jógúrt, kláraði úr dósinni og sneri sér svo að brauði og osti. Fór að máltíð lokinni að merkja eitthvað inn á túristakortin sín og blaða í bæklingum. Þegar ég að endingu stóð upp, dustaði harðfiskmylsnuna af mér og pakkaði fisknum spurði hún:

Ertu íslensk?

Ég: Já

Hún: Það hlaut að vera. Enginn annar en íslendingur gæti setið þarna svona lengi og hámað í sig ,,þetta þarna" (nikkaði á harðfiskinn).

I rest my case. Viðurkenni samt að ég varð þreytt í kjálkunum af viðureigninni við harðfiskinn.

Fór og keypti mér sódavatn. Það er munaður sem ég held að ég hafi ekkert skrifað um. Ég hef aðeins leyft mér smá sódavatn núna á inngangnum, en ekki mikið. Kannski svona 2 - 3 glös á viku, þessar 7, nærri 8 vikur... svona að meðaltali. Er ekki viss. Held að það sé ekkert það hollasta, en fannst ég mega veita mér smá gleði... ;-)

Upp úr þrjú fór ég á smá hitting á Hressó og fékk mér þá myntute. Myntuteið á Hressó er alveg GAPS, nema eflaust er myntan hvorki lífræn né vel hreinsuð áður en henni er potað í fínt teglas og borin fram með heitu vatni í katli. En samt... mjög gott framtak hjá Hressó. Sá líka á matseðlinum þeirra að þar er boðið upp á ávaxtadrykk, ,,smoothie" sem skv. lýsingu virðist vera 100% GAPS (með fyrirvara um lífræna ræktun, aukaefni, meðhöndlun hráefnis, ónákvæmni á matseðlinum o.s.frv.).

Mataðist með dætrum mínum og föður þeirra og með matnum (sem var kjúklingaleggir) var lárperumauk með hampolíu.

Hafði vit á að taka með mér BioKult og stráði úr hylkinu aftur í munnkok fyrir svefninn. Setti olíu í vinstra eyrað, það hægra alveg orðið gott.

Sunnudagur:

Helsta nýjung dagsins var ,,Butternut" grasker. Keypti það eftir bíó í gær, í Nóatúni í Nóatúni, sem ég held að sé opið allan sólarhringinn. Það tók tímann sinn fyrir öryggisverðina sem voru að afgreiða að finna út hvernig þeir ættu að verðmerkja það. Spurðu mig nokkrum sinnum hvað það héti. Lá við að ég þyrfti að stafa það. Þeir voru tveir í þessu erfiða verki og blöðuðu hvor í sínum verðlistanum dágóða stund, með miklu fjasi og vandræðagangi. En það fannst að lokum, undir merkingunni ,,Butternut grasker"... sem hljómar nú bara frekar skýrt, ekki satt?

Nema hvað, þetta gerði ég við graskerið mitt í morgun:

1. Skar í tvennt, eftir endilöngu

2. Fjarlægði steina

3. Setti inn í ofn, sárið eða skorna hliðin upp

4. Hitaði við 200°c í 1 klst.

5. Tók annan helminginn út og skóf kjötið úr hýðinu ofan í skál.

6. Setti svona 2 tsk af ghee-i út í og maukaði allt saman með gaffli

7. Bar fram með kjúklingalæri og smá ofnsoðnu grænmeti.

Svona leit það út:

Mér fannst þetta girnó þegar smellt var af, en nú verð ég að segja að þessi graskersmauksletta sem er ofan á kjúklingalærinu er ekki alveg nógu pen... gerir þetta pínu svona sjoppulegt.

En jæja, svona var þetta semsagt og bragðaðist undursamlega, með smá Maldon salti.

Síðasta nýjung dagsins var svo gerjað lýsi eða ,,fermented cod liver oil", nánar tiltekið þetta hér (smella á hlekkinn). Fékk mér þetta bara áðan og get því ekkert sagt um árangurinn.

Hvað mína líðan varðar, þá er ég e.t.v. agnarögn hressari og eyrnabólgan á undanhaldi. Hins vegar er meltingin í molum og almennt séð ekki beint hægt að tala um stórstíga framför strax.

Þar sem ég var barnlaus í dag ákvað ég að njóta þess að leggja mig aðeins um miðjan daginn. Ég svaf sko ágætlega í nótt, frá ca 12.00 til rúmlega 8.00 í morgun, ss. rúmlega 8 klukkustundir. Fleygði mér svo kl. 12.00 og ætlaði aðeins að blunda... vaknaði kl. 15.00.

Ég veit ekki með ykkur, en mér finnst ekki eðlilegt að detta út í 3 klukkutíma samfleytt um miðjan dag, eftir fullan nætursvefn. Hefði svo vel getað lagt mig aftur kl. 16.00 - eða bara núna þess vegna.

Soð: Barnið fékk nautabeinasoð (held ég) en ég ekki soðdropa alla helgina. Ekki nógu gott mál. Bæti úr á morgun - þá skánar kannski meltingin líka eitthvað.

Bað: Barnið fór í Bláa Lónið í dag og í Epsomsalt bað í gær. Ég hef engin böð farið í en ætla í eitt gott Epsom fyrir svefninn.

Pælingadagur (51...)

2010-07-29T22:49:00.002Z

Sko, það eru miklar pælingar í gangi varðandi næstu skref í mataræðinu. Ég mun breyta, á allra næstu dögum. Ég bara er ekki alveg tilbúin að leggja niður fyrir ykkur hvernig.

Það er líka ljóst að ég er ekki að taka rétt skref varðandi sjálfa mig. Ég er of slöpp, sljó, þokukennd, verkjuð og þreytt til að þetta geti gengið svona, núna. Það er eitthvað að... ég hef nokkrar pælingar, en get ekki alveg sagt til um næstu skref að svo stöddu.

Eitt get ég þó upplýst um; fyrstu hægðir dóttur minnar eftir ghee-teskeiðina voru síðdegis í dag. Þær voru blandaðar, lausar (niðurgangur) og fastar (eins og á að vera) og í kjölfar þeirra komu talsverðir magaverkir hjá henni, sem gengu þó fljótt yfir. Hún er annars búin að vera magaverkjalaus.

Nú, auðvitað kann eitthvað annað og / eða fleira að spila inn í. Á morgun eða hinn verður að prófa ghee á ný og sjá hvort aftur koma viðbrögð og hvort þau verða svipuð eða sambærileg. Um leið velti ég því fyrir mér hvort heil teskeið hafi e.t.v. verið of mikið til að byrja með?

Matseðillinn

Morgunmatur: Ofnsoðin kjúklingalæri og soðnar paprikur

Hádegis- og síðdegismatur: Lambahakkskássa með lauk, papriku, blómkáli og ferskum kóríander

Kvöldmatur: Kjúklingalæri (fyrir hana)... ég var pakksödd enn og uppþembd af kássunni. Hún borðaði ekki mikið í kvöld.

Soð dagsins: Blandað; kjúklingabein og nautabein.

Bað dagsins: Epsom (fyrir mig) og Epsom + matarsódi fyrir börnin

2010-07-28T23:22:00.003Z

Er þetta þá dagur 50... svona eiginlega?

50 dagar á mjög svo ströngu og afmörkuðu fæði, svo ekki sé meira sagt, þó að ekki sé beint hægt að segja að við fylgjum inngangsfæðinu alveg núna.

En jæja, eitt og annað er nú að gerast.

Dóttir mín:

Var í útilegu með föðurfjölskyldunni í fyrrinótt. Nærðist á kjúklingaleggjum einum saman... já og smá soðnu grænmeti. Litla hetjan mín. Hún er búin að standa sig rosalega vel og sætta sig alveg ótrúlega við sitt fábreytilega hlutskipti.

Hún fékk smá ,,verðlaun" í dag þegar ég gaf henni teskeið af gheei. Ég hef ekki gefið þessu barni mjólkurvörur í tilraunaskyni í háa herrans tíð, enda hafa viðbrögðin aldrei látið á sér standa. En það er mælt með að byrja á gheei og ég bjó til einn skammt úr lífrænu smjöri frá Biobúum í dag.

Þorði ekki að smakka sjálf, enda hefur maginn minn verið fjarri því að vera í lagi undanfarna daga og gheeið hefur ekki verið að reynast alveg hlutlaust í síðustu skipti sem ég hef prófað það.

Allavega, ég fylgdist grannt með þróun mála hjá barninu í dag. Hún sýndi engin merki um óróleika í maga eftir að hafa smakkað umrædda mjólkurvöru, né heldur snefil af hor, öndunarerfiðleika, kæfisvefn nú þegar hún er sofnuð, eða annað. Það eina sem ekki er í lagi eru útbrotin, en þau hafa smám saman verið að ágerast undanfarna daga og halda því áfram. Svo bíð ég spennt eftir næstu hægðum og krossa putta þvers og kruss í von um að þær verði fagurlagaðar 3 - 4 á Bristol chartinu...

Ég er ferlega syfjuð, en hér er grófur matseðill:

Morgunmatur minn: Ofnsoðin kjúklingalæri með soðnu blómkáli og soðinni papriku

Morgunmatur barnsins: Ofnsoðnir kjúklingaleggir

Hádegismatur: Lamba- og svínahakkskássa með lauk, papriku og hvítlauk

Kvöldmatur: Lamba- og svínahakkskássa með lauk, papriku og hvítlauk

Kjötsoð dagsins: Kjúllabeinasoð

Bað dagsins (bara fyrir hana): Epsomsalt + matarsóti

Komnar heim

2010-07-27T22:40:00.003Z

Held að í dag sé dagur 49. Er ekki alveg viss.

Get því miður ekki skrifað nákvæmlega hvað við höfum snætt frá því á laugardaginn, en ég get sagt aðeins frá stöðunni og svona því sem verið hefur að gerast.

Sunnudagurinn var erfiður. Það er ekkert grín að gera af vanefnum nesti fyrir 3 manneskjur sem eru að fara að ferðast þúsundir kílómetra og þrífa í leiðinni 3ja hæða hús ein með tvö börn á rigningardegi. Þetta hefði satt að segja verið auðveldara ef veðrið hefði verið betra... en það var öskrandi hellidemba frá hádegi og ekki hundi út sigandi. Ergó; mikið vídeógláp, en meira að segja börn verða þreytt á vídeóglápi á meðan mamman æðir út um allt og reynir að gera allt í einu.

Svo er það maginn á mér, hann var ekki par hress á laugardaginn, fór versnandi á sunnudaginn og var satt að segja ómögulegur í gær. Virkilega slæmur, ég átti eiginlega bara svolítinn veikindadag hér, nýkomin heim og svona. Ekki mjög gaman.

Maginn var umtalsvert skárri í dag, hægðir komnar í lag, en dálítil ólga enn. Ég hef ekki glóru um hvað veldur. Það er svo margt sem kemur til greina. Dodgy kjúklingaleggir frá því á föstudaginn? Eða lummurnar frá því á föstudaginn? Nautakjötið á laugardaginn? Stressið á sunnudaginn? Álagið bara? Eða voru myglusveppirnir í húsinu sem við gistum í farnir að ná til mín (það væri ekki í fyrsta sinn sem ég verð veik af tiltekt og þrifum - ætli það sé hægt að fá vottorð...? ;-)).

Annars gæti líka verið um að ræða lauflétta umgangspest. Hver veit.

En ég var allavega með beinverki og alls konar í gær. Og þá var nú ljúft að hafa Epsom-salt og stórt og gott baðkar við höndina. Mmmmh...

Dætur mínar hafa verið mikið hjá föður sínum. Eru núna í útilegu.

Í gær og í dag erum við eldri dóttir mín aftur á Stigi 1. Það er hugsað sem eins konar endurstilling, ekki að við séum að byrja upp á nýtt, heldur meira bara eins konar núllpunktur. Mig langar nefnilega að prófa að gefa henni ghee og þá vil ég ekki að það séu neinir aðrir faktorar í mataræðinu sem geta haft áhrif.

Planið sem ég styðst við núna er að færa okkur yfir í sætuefnalausa útgáfu af GAPS... sem mér finnst samt hundleiðinlegt. Ég ELSKA kökur, sérstaklega hrákökugotteríið sem ég hef verið að gera undanfarna mánuði (þar til við byrjuðum á innganginum)... en ég veit að þetta er afstætt. Í fyrsta lagi þolum við þetta ekki mjög vel (við fáum iðulega sveppasýkingar) og í öðru lagi þá er þessi nautn / craving eflaust að einhverju leyti tilkomin vegna ójafnvægisins sem þessu bindindi er ætlað að laga. Það er sagt að þetta sé þess virði... en ég á eftir að kynna mér þetta nánar. Á von á sætuefni sem ég pantaði að utan (Steviu) sem ekki mun almennt espa candida, en sem ekki er almennt talið leyfilegt á GAPS. Skoða það mál.

En semsagt... kjötbollur (fyrir mig og dóttur mína) og lummur (bara fyrir hana) á heimleiðinni á sunnudaginn og svo bara mest kjúklingaleggir (íslenskir, aukaefnalausir, ferskir og fínir...) og grænmeti. Líka silungur. Og kálfafillé. Og nautafillé. Yndislegt.

Ekki snefill af nautahakki... ég sver ;-)

Og svo kemur í ljós að kjötsoð af ferskum kjúklingaleggjum er bara ljómandi bragðgott. Aldrei átti ég von á að ég myndi lýsa þeirri skoðun... en svo er nú samt.

Tveir hressir dagar

2010-07-24T19:35:00.002Z

Hef lítinn tíma til að skrifa núna, fer heim á morgun. Þetta hafa verið ágætir dagar.

Matseðill

Mikil kássa, allan daginn
Líka steikt nautahakk og soðið grænmeti
Lummur fyrir börnin (t.d. í nesti í gær þegar við fórum í heimsókn)
Fékk fullt af heimaræktuðum ferskum kúrbít af öllum stærðum og gerðum í gær þegar ég fór í heimsókn... alger unaður... Mmmmmh... borðaði þannig steiktan upp úr andafeiti í morgun, en dætur mínar deila ekki þessari ástríðu með mér.
Linsoðin egg í morgunmat í dag (keyptum í gær, voru ekki til).

Heilsan

Maginn á mér er eitthvað úr skorðum. Skelli skuldinni á lummuát. Samt ómögulegt að vita. Eggin eru heldur ekki að fara vel í mig (borðaði bara eitt í dag, en það eru líka egg í lummunum). Engin krísa í maganum, bara frekar mikið ,,rumbling"

Húð dóttur minnar er með sóma. Engir sterar í 2 daga. Í gærmorgun fórum við báðar í sturtu. Þar sem mikið var eftir af Bláa Lóns leirnum að norðan þá tók ég hann bara allan og makaði á okkur. Voilá, húðin bara fín alveg síðan.

Auðvitað voru sterarnir eitthvað búnir að undirbúa jarðveginn, en þessi steraumferð er allt öðru vísi en sú síðasta. Síðast bar ég 14 sinnum á hana sterakrem um allan kroppinn. Núna... tjah... svona 5 sinnum kannski... leirinn var virkilega að gera eitthvað.

Skap dóttur minnar hefur verið upp og ofan. Stutt í tár, sem er ótýpískt fyrir hana.

Jæja, erfiður dagur fyrir höndum á morgun. Hústiltekt (3 hæðir) og hreingerning með tvo gemlinga á útopnu og nestun fyrir langa ferð heim. Fjúh...

Fagur dagur

2010-07-22T20:49:00.002Z

Það er nú meira hvað ég er komin með einbeittan brotavilja...

... alltaf eitthvað að stelast.

Í dag stalst ég í gulrótarsneið, ss. var að saxa niður gulrót og stakk upp í mig sneið. En sú firra...

Og svo stalst ég í möndlusmjör og gaf dóttur minni líka (synd að henda því sem eftir er þegar krukkan er ,,tóm" af þessari rándýru matvöru). Bæði smá dökkt, lífrænt hunang og líka smá draslhunang (sem var í lummum sem bakaðar voru fyrir gestina). Og já, brauðbita af brauði yngri dóttur minnar sem ég bakaði í kvöld. Það innihélt m.a. banana.

Lítið smakk af hverju... en samt. Ég er öll í smökkunum þessa dagana. Finn hvað ég þrái tilbreytingu. Og hunang og banani eru alls ekki góðar hugmyndir, vegna sætunnar.

Það komu semsagt gestir í dag. Ég gaf þeim lummur. Gerði möndlusmjörslummur fyrir stóra ljósið mitt (möndlusmjör + egg + lambafita) og hnetusmjörs- fyrir hina, með smá hunangi af því að inngangs-bragðið er einfaldlega ekki allra. Steingleymdi kúrbítnum. Endurtók samt leikinn í kvöld og sleppti þá hunanginu en mundi eftir kúrbítnum í báða lummuskammtana og setti líka banana í hnetusmjörslummurnar (fyrir þá yngri).

Alls held ég að ég hafi eytt 4 eða 5 klst. í eldhúsinu í dag, sem er svona í hærri kantinum, en ekkert einsdæmi þessa dagana.

Mér leiðist rosalega, þegar aðstæður eru svona, hvernig eldhúsið hérna er. Það er sér vistarvera, aflokuð frá rest af íbúð fyrir utan borðstofu (dyr fram í borðstofuna). Þegar maður eldar snýr maður baki í allt og alla og ómögulegt að eiga samskipti við börnin til dæmis.

Heima hjá mér er eldhúsið algerlega hjarta heimilisins og maður getur eldað eins og vindurinn en samt hjálpað við heimanám, spjallað, gefið góð ráð, stuðning, grínast, jafnvel horft á sjónvarpið og svo framvegis, allt á meðan maður eldar. Ég á eftir að sakna þessarar aðstöðu ef ég flyt í aðra verri.

Heilsan okkar var annars sæmó í dag. Ég var með dálítið mikil die off einkenni og sakna Epsom-baðs heil ósköp. Ætli það fáist í kílóavís hér á góðum prís eins og heima? Og ætli ég geti leigt íbúð með baðkari...? Hægðir með ágætum.

Tók 3 tsk af súrkálssafa í dag, sem er persónulegt met í þessari umferð og kann að eiga þátt í þessum miklu die off einkennum.

Dóttir mín virðist ágæt, hægðir með sóma og útbrot í rénum fyrir tilstilli sterakremsins. En það skortir dálítið upp á andlegt jafnvægi, sem er alvarlegt mál en ég veit ekki alveg hvað veldur. Sterar, nýjungar, aðstæður... hvað veit maður?

Matseðill

Morgunmatur: Köld kássa fyrir barnið, kalt nautaket og kúrbítsgrænmetisblanda fyrir mig

Hádegismatur: Lummur (möndlusmjörs- fyrir hana, hnetusmjörs- fyrir aðra (ég fékk mér bara eina))

Síðdegishressing: Kássa

Milli mála: Sítrónuklakar

Kvöldmatur: Nautakjöt... aftur. Aftur kúrbítsgrænmetisblanda og lárperumauk með. Kjötið er dálítið seigt...

Engin böð.

Soð: Kjúklingabeinasoð

Dagur 43

2010-07-21T20:43:00.002Z

Það er í svo mörg horn að líta, svo margt að gera og ég svo þreytt og skýjuð í kollinum að það er virkilega erfitt að henda reiður á öllu sem ég tel ástæðu til að fjalla um hér.

Látum okkur sjá.

Við héldum áfram með nýjungar í dag, sem ég ítreka og undirstrika að er ekki alveg í samræmi við Inngangsferlið enda lít ég svo á sem við séum hættar því og farnar að impróvisera svolítið. Samt erum við í höfuðdráttum enn á inngangsfæði. Ég er mjög hugsi yfir því hvort ég á að halda áfram að númera dagana.

Nýjungar dagsins:

Sítrónuklakar (sítrónusafi + vatn, fryst)
Smá möndlumjólk (ristaðar möndlur + kókosmjöl)

Ég fékk mér líka pínu ferska steinselju af því að ég var að fara í atvinnuviðtal og nautahakkskássur með hvítlauk kvölds, morgna og miðjan dag gera konu andfúla í meira lagi.

Og svo fengum við okkur aftur gulrótarsafa í morgunsárið, jafn lítinn og síðast og aftur útþynntan í vatni. Mjög gott, samt.

Ég bar sterakrem á úlnliði barnsins í nótt og einu sinni á alla helstu útbrotablettina nú í kvöld. Ekki í morgun. Hún er ekki orðin alveg eins slæm og hún var, það eru aðallega hendur og úlnliðir sem eru slæm svæði.

Hvað varðar nýjungar og viðbrögð við þeim lít ég aðallega til

hægða
öndunar
hegðunar

hjá dóttur minni og

hægða
vöðva- og liðverkja

hjá sjálfri mér.

Hegðun barnsins var ekki nógu góð undir kvöldið. Það kom dálítið langur tími þar sem hún var óróleg, hagaði sér frekar illa og tók engum sönsum. Vil líka geta þess að ég fyrrakvöld var hún með fótleggjaverki sem eru alltaf eins, alltaf í sköflungnum vinstra megin og koma oftast á kvöldin. Setti á hana vöðvakrem þá og svo aftur um nóttina þegar hún kvartaði. Ólíkt exemkreminu þá svínvirkar heimatilbúna vöðvakremið mitt (kókosolía + kamfórudropar + eucalyptuskristallar).

Hægðir í góðu lagi, hins vegar.

Sjálf fann ég mikil ,,die off" einkenni í dag, sem e.t.v. má rekja til gulrótarsafans eða steinseljunnar. Hver veit. Litlu liðirnir eru heldur enn ekki orðnir góðir.

Matseðillinn

Morgunmatur: Nýpressaður og síaður, vatnsþynntur gulrótarsafi í forrétt og kássa í aðalrétt.

Hádegismatur: Linsoðin egg

Kvöldmatur: Ofnsoðið nautakjöt (ath. ekki hakk!!!) með rifnum kúrbít, lauk, brokkólí og eplaediki og lárperumauk með.

Engin böð sem skipta máli

Soð: Kjúklingabeinasoð

Dagur 42

2010-07-20T20:17:00.002Z

Hydrocortisone aftur í dag.

Sítrónuvatn nýtt fyrir mig og þá eldri í dag.

Linsoðið egg aftur fyrir þá eldri í dag.

Linsoðið egg aftur (eftir nokkurra daga hlé) fyrir mig í dag.

Allt virðist þetta fara ágætlega í okkur.

Litlu liðirnir mínir voru enn harla stirðir í morgun. Ekki alveg jafn slæmir og í gærmorgun, en alls ekki í góðu standi.

Matseðillinn

Morgunmatur: Nautahakkskássa og kjúklingaleggir (rest frá því í gær)

Hádegismatur: Nautahakkskássa

Kvöldmatur: Pönnusteikt nautahakk, soðin paprika + gulrætur og lárperumauk. Sítrónuvatnsglas í ,,eftirrétt".

Soð: Kjúklingabeinasoð

Engin böð.

Fáránlegt hvað steikt nautahakk er mikill munaður eftir nokkrar vikur af soðnu...

Löööööng færsla og dagur 41

2010-07-19T19:59:00.002Z

Vaknaði í morgun með vítisverki í litlu liðunum. Hendurnar verða alltaf sérstaklega slæmar. Í svefnrofunum reyndi ég að útiloka tilfinningu frá úlnliðum og fram úr, um leið og ég taldi í mig kjark til að láta undan þessum bröltandi börnum og staulast fram. Um leið fór hugurinn á fullt að leita að ástæðu. Af hverju svona slæmt núna? Hvað hefur breyst?

Svona var þetta nefnilega alltaf. Hvern morgun staulaðist ég fram á baðherbergi með hendurnar krepptar og lét renna í vaskinn jafn heitt vatn og ég gat þolað. Eftir nokkrar mínútur ofan í fóru hendurnar að linast og þá gat ég farið að nota þær, t.d. til að staulast í sturtu og lina restina af kroppnum. Svona var gaman að vera á þrítugsaldri.

Eins og endranær var hefðbundna heilbrigðiskerfið ekki að gera sérstaklega góða hluti fyrir mig. En á endanum rataði ég til yndislegs hómópata sem upplýsti mig um gagnsemi Omega olía. Smátt og smátt lærðist mér að með frekar heilnæmu fæði, mikið til lífrænu, litlum sykri / hveiti og miklum Omega olíum má halda verkjunum að nokkru leyti í skefjum. Olíurnar hafa alltaf verið crucial.

Eftir að ég byrjaði á GAPS hefur ástandið almennt verið skárra. Svolítið skrítið samt. Fyrstu mánuðina var ég oft með undarlegan seiðing í litlu liðunum og fram í fingurgóma, svona smá-hlýju, samt ekki... frekar skrítið. Ég hef áfram stólað mjög mikið á góðar Omega-olíur.

Þess vegna kveið ég svolítið fyrir innganginum. Ég hugsaði; hvað verður um mig án hækjanna minna (Omega 3-6-9)? Sá fyrir mér vítiskvalir hvern morgun. Eftir nokkra daga, svona þegar versta die offið var afstaðið man ég samt til að hafa sérstaklega beint sjónum að höndunum á mér á morgnanna þegar ég vaknaði og það kom mér skemmtilega á óvart að þær voru vel nothæfar. Pældi svo ekki meira í því og hef ekki pælt í því síðan. Það er auðvelt að hugsa ekki um það sem ekki er til staðar.

Nema hvað... þar til í morgun. Vá, hvað þetta er fáránlega vont. Þetta kom alveg af fullu blasti, engin linkind. Fór beint undir heita bunu með hendurnar og svo í langa og heita sturtu. Varð starfhæf á ný, en samt illt.

Það sem helst liggur undir grun sem orsök nú eru lummurnar. Ég veit ekki nóg til að geta dregið vísindalega ályktun hér, en ég skal deila því sem ég er að hugsa. Ég hef lesið um það, á GAPS, að sumir, sem eru „langt leiddir“ geti aldrei borðað „bakaðar vörur“, svo lengi sem þeir lifa. Ég man hve mér rann kalt vatn á milli skinns og hörunds þegar ég las þetta fyrst. Þetta fór beint í afneitunarhólfið í heilanum. En svo er ég búin að lesa þetta of oft síðan til að geta látið sem ég hafi aldrei heyrt af þessum möguleika. Sumir hafa þó skrifað að þetta ástand vari bara lengi, en ekki endilega ævilangt. Þau segja að maður / kona eigi að halda sig frá bökuðum vörum í bataferlinu ef maður / kona verður var / vör við einkenni. Í vetur, þegar við vorum á fullu GAPS-fæði, var ég alveg búin að ná því að bakaðar vörur, brauðið og kökurnar, voru ekki að gera góða hluti fyrir mig. Það var því almennt ekki hluti af minni daglegu fæðu og ég saknaði þess ekkert óbærilega. Nú er ég búin að prófa lummur þrisvar, á þessu inngangsfæði. Í öll skiptin hef ég, eftir u.þ.b. 30 mínútur frá neyslu, fengið óbærilega sára magakrampa. Frekar óæskilegt form á hægðum í kjölfarið. Í gær borðaði ég heilar 3, sem er ekki alveg samkvæmt bókinni (það á að byrja hægt) og því er kannski ekki svo skrítið að álykta að lummurnar beri ábyrgð á liðverkjunum í morgun. Punkta þetta allavega hjá mér, held mig frá bökunarvörum á næstunni, skvetti í mig hörfræolíu og sé hvernig fram horfir.

Get heldur ekki litið fram hjá gulrótarsafanum sem einnig kom nýr inn í fæðið í gær. Hann hefur jú þá þekktu virkni að vera afeitrandi. Þetta gætu verið die off verkir í liðunum. Hver veit.

Og þá að pælingum um dóttur mína. Ég er að velta fyrir mér skapinu. Í gær var í henni þessi leiðinlegi óróleiki sem slær mann alltaf út af laginu. Líka mikil neikvæðni og hreinlega bara fýla. Samt segist hún fíla Noreg og vill ólm flytja hingað. Þolir ekki systur sína og er með hundshaus yfir öllu. Mjög þreytandi og reynir á mitt skap líka.

Óróleikinn var sem betur fer ekki til staðar í dag, en fýlan var viðvarandi framan af degi. Sem betur fer náði hún að hrista hana af sér um það leyti sem við fórum á útstáelsi. Nema hvað; ég vildi bara segja að ég velti því fyrir mér hvort egg, gulrótarsafi, Omega-olían eða annað nýlegt í fæðunni geti valdið þessu.

Ég þarf að fara að drífa mig í annað, þannig að ég fer að reyna að ljúka þessari löngu færslu. Nýjung dagsins í dag fyrir dóttur mína var linsoðið egg. Hún er búin að fá eggjarauðu út í kjötsoð og egg í lummu, en nú linsoðið. Bara eitt samt.

Engar hægðir í dag, en vonandi koma þær sjálfkrafa á morgun. Exemið er orðið mjög slæmt, svona nokkurn veginn að ná því sem það var verst þarna um daginn. Hún fúlsar við venjulegu kremi, finnst það bara gagnslaust - plat. Held að við prófum stera aftur á morgun, þar til við komumst heim.

Matseðillinn

Morgunmatur: Nautahakkskássurest + linsoðið egg fyrir barnið

Hádegismatur: Kjúklingaleggir og soðið grænmeti

Síðdegisnesti: Kjötbollur (frá því í fyrradag) og lummur (frá því í gær)

Kvöldmatur: „Steikt“ kjöthakk (á pönnu) með soðnum gulrótum, papriku og kúrbít. Lárperumauk með.

Kjötsoð: Kjúklingabeinasoð

Ekkert bað, bara sturta í morgun.

Enn einn dagur...

2010-07-18T20:30:00.002Z

Vá, ég ætlaði sko að blogga svo mikið í kvöld.

Fullt af hlutum sem ég ætlaði að fara í sem ég hef ekki gefið nógan gaum undanfarið, eða fjallað um á óskýran hátt. En svo er klukkan bara orðin svo MARGT. Og ég svo þreytt.

VERÐ að fara að lúra.

Mjög stutt: Hægðir fremur góðar, skap dóttur minnar með verra móti, útbrotin sækja þétt á.

Matseðill

Morgunhressing: Um 1/3 glas af nýpressuðum og vel síuðum gulrótarsafa, þynnt með smá vatni

Morgunverður: Nautahakkskássa

Hádegisverður: Nautahakkskássa og möndlusmjörslummur (= möndlusmjör, egg, kúrbítur, dýrafita)

Kvöldverður: Nautahakkskássa

Soð: Kjúllabeinasoð

Engin böð

Og lummur eru ekki góðar fréttir fyrir mig... held mig frá slíku á næstunni.

Dagur 39 + 1 árs afmæli + einbeittur brotavilji...

2010-07-17T20:12:00.003Z

Jæja, loksins eitthvað að gerast.

Sko.

Í dag er ár síðan við byrjuðum á GAPS. Mikið hefur gerst á þessu ári.

Í dag ákvað ég jafnframt að segja formlegum inngangi lokið, allavega að sinni. Ekkert að detta í pizzu og kók, sko, ef það er það sem einhverjum dettur í hug. Bara að víkja aðeins frá hinu stífa plani.

Í stuttu máli erum við ca á stigi 3 eða 4, en vegna aðstæðna eru frávikin og undantekningarnar svo mörg / margar að það er varla hægt að tala um stig.

Hafandi rætt við mér reyndara fólk og kynnt mér málin er stefnan í grófum dráttum að aðlaga mataræðið að þörfum okkar hér og nú, upp að skynsamlegu marki, það er að segja. Ekkert sjokk-treatment neitt. Sé svo til þegar ég kem aftur heim að hve miklu leyti ég endurmet stöðuna á nýjan leik þá.

Matseðillinn

Morgunmatur: Kjúklingahakkskássa

Hádegismatur: Kjúklingaleggir

Síðdegisverður: Lax og kúrbítsgrænmetisblanda frá því í gær

Kvöldverður: Kjúklinga- og nautahakksbollur með brokkólí, basilíku, lauk og hvítlauk. Soðnar gulrætur og paprikur með. Einnig gulur kúrbítur, hægsteiktur upp úr andafeiti með sjávarsalti (spari!).

Annað: Fengum báðar hörfræolíu og súrkálssafa

Ég smakkaði líka dropa af möndlumjólk yngra barnsins og nokkrar litlar flísar af möndlubrauðinu.

Kjötsoð dagsins: Kjúklingabeinasoð

Dagur 38

2010-07-16T19:15:00.002Z

Barnapían farin. Dóttir mín dálítið stúrin í dag, e.t.v. vegna skilnaðarins við barnfóstruna heitt elskuðu. Annars áttum við ágætan dag, lungann úr deginum skein sólin glatt og við létum fara vel um okkur á svölunum. Hömstruðum D-vítamín - þær stuttu tættu sig úr hverri spjör. Eldri dóttir mín prófaði, af eigin frumkvæði, að liggja í sólstól eins og ég. Eftir nokkrar mínútur fór henni að þykja það óbærilega leiðinlegt og spurði hvort það væri skilyrði að liggja kyrr. Ég sagði svo ekki vera. Þá ákvað hún að dansa í sínu sólbaði... sem hún og gerði, listilega eins og henni einni er lagið.

Ég fann 10 l fötu í kjallaranum, fyllti hana af volgu vatni og hellti matarsóta út í. Matarsóta fann ég loks í stóru búðinni sem ég fór í á miðvikudagskvöldið - eftir að hafa leitað að matarsóta út um allt síðan ég kom. Þessi matarsóti var samt bara eitt lítið bréf, frá Santa María. En allavega, dætur mínar fengu matarsótafótabað og höfðu gaman af (ég stakk líka 1 1/2 fæti ofan í).

Annars fór bara dagurinn í trampólínhopp og eitt og annað skemmtilegt, m.a. smá sjónvarpsgláp inni við þegar sólin var ekki sjáanleg og jóga og fleira. Nú er ég opinberlega komin í sumarfrí og atvinnuleitin verður í 2. sæti.

Leiðinlegu fréttirnar eru að hægðir dóttur minnar fóru versnandi er leið á daginn, sem kann að stafa af egginu. Kann líka að stafa af svíninu sem við fengum í hádeginu. Það fór ekki vel í mig. Ég fann ekkert sykurbragð, en geitungarnir voru óðir í það. Þeir hunsuðu allt annað, þar með talið hunangið sem ég fór með út í skál, gagngert til að laða þá að (svo að ég gæti svo lymskulega fært skálina fjær og þá þar með...). Þannig að ég veit ekki hvað skal halda. Er lenska hér að sprauta svínaket með sykri?

Matseðillinn

Morgunmatur: Kássa (hakk + grunsamlega grænmetið frá því í gær = mjög gott saman!)

Miðdegisverður: Ofnsoðnar, úrbeinaðar svínakótilettur með rifnum kúrbít, gulrót, lauk, hvítlauk, blómkáli og eplaediki + lárperumauk.

Kvöldverður: Nautahakkskássa með ferskri salvíu (mjög gott!) - maukuð fyrir barnið en ómaukuð fyrir mig.

Kjötsoð: Kjúklingasoð

Bað dagsins: Matarsótafótabað

Dagur 37

2010-07-15T20:42:00.003Z

Byrjum á kjúklingnum. Þegar ég keypti leggina í massavís í gær, þá keypti ég líka eitthvað sem ekki voru leggir, ég held að það hafi verið kjöt af leggjum sem búið var að flá af... eða eitthvað þannig. Er samt ekki alveg viss. Það var í svipuðum pakkningum, ívið dýrara en líka á tilboði enda á síðasta neysludegi. Þannig að ég keypti það og byrjaði að elda það í hádegismat. Þ.e.a.s. ég tók það úr kæli og byrjaði að skera grænmeti en barnapían tók svo við að elda. Hún er með kvef og alveg stíflað nef (ég held að það sé af því að hún sefur í myglaða kjallaranum, en það er önnur saga). Allavega. Þegar ég settist við matarborðið sló fyrir vit mér fiskilykt. Ekkert eitthvað hræðilegri og úldinni, bara fiskilykt. Svona eins og ýsan frá því í gær eða eitthvað. Ég hafði orð á því og hnusaði í kringum mig, en enginn annar sagði neitt. Barnfóstran var langt komin með sinn mat, eldri dóttir mín einnig og sú minnsta er hvort eð er mesti matvendnisgikkur þessa dagana og vildi ekki kjötið. Þannig að ég fékk mér skammt og fannst hann strax eitthvað óvenjulegur á bragðið. Ekkert svona sláandi stækur... bara ekki góður. Tók nokkra bita úr eldfasta mótinu og þefaði... sumir virtust alveg eðlilegir... aðrir svolítið eins og fiskur. Barnapían finnur ekkert bragð vegna kvefsins og var ekki alveg í rónni þegar ég fór að grufla í matnum. En það endaði með því að ég tók kjúllann úr umferð. Þetta var eitthvað ekki í lagi.

Engum varð þó meint af, allavega ekki merkjanlega. Allar borðuðum við eitthvað smá og engin okkar hefur fengið í magann.

Ég var og er í smá vafa um grænmetið sem var með kjúllanum. Það var í sama eldfasta móti og allt löðrandi í hlaupinu úr kjúklingnum. Tímdi varla að henda því, í ljósi þess hvað matur kostar hér. Geymdi það fram á kvöld, hef grandskoðað það, þefað, hnusað og rótað... ákvað að geyma það til morguns. Það er engin fiskilykt af því. Nota það kannski í kássu? Ábendingar / viðvaranir samt vel þegnar.

Annars sló maturinn í dag í gegn. Kjúklingaleggirnir í morgun voru algert hit. Og grænmetið með kvöldmatnum var svo gott að báðar dætur mínar, sem alla jafna setja upp skeifur og hundshausa og vælutón og leiðindi þegar kemur að soðna grænmetinu (barátta hvern dag) báðu báðar um meira auk þess sem hún eldri átti vart orð til að lýsa því hvað þetta var ljúffengt.

Svona var grænmetið:

1 skrældur rifinn kúrbítur
1 fínt skorinn laukur
2 smátt rifin hvítlauksrif
(ofangreindu blandað saman)
1 blómkálshaus, hnausarnir brotnir af og raðað ofan á blönduna
Smá skvetta af eplaediki yfir allt saman
Álpappír ofan á og inn í ofn við 200°c í um klst.

Þar sem þær hata eldað blómkál en það lá bara ofan á leyfði ég þeim að tína hnausana frá og þá vakti þetta semsagt þvílíka lukku.

Ég er annars sísvöng og alltaf með craving. Held að þetta sé ekki í lagi núorðið. Sumar upplýsingar benda reyndar til þess að það sé það, að meinvirku örverurnar séu í dauðateygjunum að sleppa endalausum eiturefnum út í kerfið mitt sem gera mig svona slappa, sljóa og svaaaaanga... En ég er hvorki viss um að þetta sé í lagi, né um að ég vilji hafa þetta svona. Ég meina, það er dagur 37 og 2 dagar í ársafmæli á GAPS. Ég á ekki við að þetta sé óeðlilegt, bara ekki ásættanlegt. Þarf að skoða þetta betur og finna út hvað ég ætla að gera í þessu.

Hægðir dóttur minnar voru frekar linar í morgun, en samt myndi ég segja eðlilegar. Útbrotin eru hins vegar óðum að ná sér á strik eftir sterabælinguna. Hún er farin að klóra sér talsvert, en þó ekkert enn á við það sem var.

Nýjungar dagsins:

Ég fékk mér eina teskeið af hörfræolíu.

Dóttir mín fékk eina hráa eggjarauðu út í kjötsoðið í morgun.

Matseðillinn góði

Morgunmatur: Ofnsoðnir kjúllaleggir (og soðið grænmeti fyrir mig, nennti ekki að pína það í börnin að þessu sinni)

Hádegismatur: Ofnsoðinn fiskikjúlli með grænmeti

Kvöldmatur: Ofnsoðinn lax með rifnum kúrbít, lauk, hvítlauk og blómkáli

Kjötsoð dagsins: Síðustu dropar sauðasoðs framan af og kjúllasoð seinnipartinn

Hef verið dálítið of lin við að koma soðinu í dóttur mína. Verð að taka mig á.

Barnapían fer í fyrramálið. I'll be on my own... :-o

Dagur 37

2010-07-14T22:25:00.002Z

Í kvöld gerði ég loksins nokkuð skynsamlegt.

Hingað til hef ég svo til hvern dag rogast heim með mat. Húsið sem við dveljum í er uppi í hæðunum, efst í Osló. Frá jarðlestarstöðinni og hingað upp er, skv. netinu (og hver vill rengja það) 12 mínútna gangur - allt upp í móti (smá jafnslétta um miðbik leiðarinnar reyndar). Það er ekkert annað en hundleiðinlegt að rogast þessa leið með poka dag hvern. Búðir hverfisins eru viðlíka langt í burtu og jarðlestarstöðin og þær leiðir jafn brattar.

Annar galli við þetta rogast-með-mat-daglega fyrirkomulag er að það er dýrt. Ódýrustu búðirnar eru ekki alltaf í leiðinni, það borgar sig ekki alltaf (tíma-, orku-, fyrirhafnar- og jafnvel fjárhagslega séð) að taka krókinn í næstu ,,ódýru" búð. Til dæmis eru búðirnar í hverfinu báðar mjög dýrar og ekki alltaf sem ég hef haft ráðrúm til að taka jarðlestina í næstu skaplegs-verðs-búð. Matarkostnaður hefur því verið ansi hár á hverjum degi eins og ég var að tala um um daginn.

Þannig að, eins og ég segi, ég gerði nokkuð skynsamlegt í kvöld. Ég fór í ódýran stórmarkað. Til þess að svo mætti vera þurfti ég að fá lánaðan bíl sem tilheyrir vinnu mannsins sem leigir íbúðina sem ég dvel í núna. Ég verslaði fyrir... (haldið ykkur fast):

44.815.- ISK

Deilt niður á þá 11 daga sem við eigum eftir að vera hér gerir það ríflega 4.000.- kall á dag. En það er ekki dýrara - og jafnvel heldur ódýrara, en ef ég hefði haldið áfram að fylla bakpokann minn og rogast með níðþunga poka dag hvern.

Allt sem tengist matarkostnaði hér eru svo háar tölur. Mig svimar og sundlar og ég fæ í magann... en ég kann engin ráð sem stendur. Önnur en að spýta í lófana og herða enn á atvinnuleitinni.

Og fyrst ég er að kvabba um þetta þá vil ég láta þess getið að við fengum rausnarlegan fjárstyrk frá velviljuðum aðila í fjölskyldunni í síðustu viku. Hann er uppurinn nú, en að sjálfsögðu munaði verulega um hann.

Svo vona ég bara að VISA-kortið mitt fái núna að hvíla sig, allavega fram á næsta tímabil (5 dagar). Það er víst engin leið að flytja ókeypis á milli landa, sérstaklega ekki þegar í brottfararlandinu ríkir kreppa.

Eitt enn um matarinnkaup / búðarferðina: Ég fann loks langþráða kjúklingaleggi. Langþráða því a) þeir eru svo einfaldir í framreiðslu, bara henda í form, álpappír yfir og inn í ofn

b) beinin úr þeim eru frábær uppistaða í kjötsoð

c) börnin elska þá

d) það er ekki bara mögulegt heldur hreint og beint tilvalið að pakka þeim sem nesti og fara hvert sem er...

Þeir voru á tilboði og kostuðu þannig svipað og þeir gera í Bónus, sem er virkilega í frásögur færandi því annað er flest miklu dýrara hér en heima. En sá galli var á gjöf Njarðar að síðasti neysludagur var Í DAG... þannig að megnið af þeim fór beint í frysti en lítill skammtur bíður þess að verða hitaður í fyrramálið.

Annar galli var að ég er ekki viss um að þeir séu lausir við sykursprautun eða eitthvað álíka. Það stóð ekkert þannig á pakkningunum og fólk sem ég hef rætt við virðist standa í þeirri trú að það tíðkist ekki í Noregi, en ég get náttúrlega trauðla vitað það fyrir víst...

Hvað um það, ég reyni bara að einblína á björtu hliðarnar og hlakka virkilega til að segja dætrum mínum frá þessum happafundi, þær hafa suðað svo um blessaða leggina ;-)

Yfir í annað:

Ég borðaði enga lárperu í dag en fékk mér hins vegar kjötsoð. Maginn er skárri (ekki = góður enn). Andinn þjakaðari en nokkru sinni fyrr.

Í gær var fyrsti sterakremslausi dagurinn í viku fyrir dóttur mína og í dag var exemið farið að vera svolítið áberandi á ný - húðin á handleggjunum var byrjuð að bólgna upp og litlar bólur farnar að skjóta upp kollinum mjög þétt. Þá er bara að sjá hvort við getum haldið þessu í einhverjum skefjum þar til hún kemst heim.

Matseðillinn

Morgunmatur: Kássa

Hádegismatur: Kjötbollur (svipaðar og síðast)

Kvöldmatur: Kjötbollur og ég svældi líka í mig smá af ýsurest (fæ alltaf heifarlegan sviða í varirnar af ýsu, gafst á endanum upp, áður en ég var búin með allt).

Soð dagsins: Nýtt nýsjálenskt sauðasoð (fann beinin 3 sem ég setti í frysti af síðasta skammti)

Engin böð önnur en sturta

Dagur 36

2010-07-13T20:39:00.003Z

Ókey, er ekki kominn tími til að vera svolítið skipuleg, líta um öxl, draga saman og svona? Ég er reyndar hrikalega syfjuð núna, þannig að e.t.v. verður einhver express bragur á þessu.

Allt var í svipuðu horfi í dag og í gær. Gráa hakkið bragðaðist sæmilega, hvorki undurvel né -illa. Keypti annað kíló af því í dag, munar um minna.

Nú langar mig að taka aðeins saman. Þetta er það sem er í boði fyrir mig að borða / drekka:

Kjötsoð (stig 1)
Kjöt-, fisk- eða grænmetissúpur (okkur leiðast súpur, þess vegna eru þær aldrei á matseðlinum...) (stig 1)
Soðið kjöt / fiskur (stig 1)
Soðið grænmeti (stig 1)
Engiferte (stig 1)
Kjöt- og grænmetiskássa (með smá ferskum kryddjurtum) (stig 2)
Lárpera (stig 3)
Súrkálssafi (stig 3)
Eldaður laukur (stig 3)

Eftir sykurssvínsóhappið er ég orðin nokkuð klár á því að bæði egg og ghee fara illa í órólega magann minn. Gruna lárperur líka... sleppi þeim á morgun.

Var ég líka búin að nefna hvað ég koksa alltaf eftir máltíðar þessa dagana? Betaine HCl myndi hjálpa hvað þetta varðar, en ég skildi það eftir heima og þori ekki einu sinni að gá hvað það kostar hér...

Þetta er það sem er í boði fyrir barnið:

Kjötsoð (stig 1)
Kjöt-, fisk- eða grænmetissúpur (okkur leiðast súpur, þess vegna eru þær aldrei á matseðlinum...) (stig 1)
Soðið kjöt / fiskur (stig 1)
Soðið grænmeti (stig 1)
Engiferte (stig 1)
Kjöt- og grænmetiskássa (með smá ferskum kryddjurtum) (stig 2)
Eldaður laukur (stig 3)

Hún fékk að prófa lárperu aftur í dag, nú bíð ég spennt eftir niðurstöðunum.

Ég verð að viðurkenna að ég er svolítið strand. Framfarir hafa ekki verið sem skildi og ég held að þetta flandur á okkur hafi sett aðeins of mikið strik í reikninginn. Viðkvæmu litlu kerfin okkar eru að kljást við alls kyns andlegt og líkamlegt áreiti sem er þeim framandi, þannig að það er ekki nema eðlilegt að það setji strik í inngangsreikninginn og geri af verkum að það hægi á árangrinum.

Ég er aðeins að velta því fyrir mér hvaða afstöðu ég á að taka hér og nú. Halda áfram á inngangi eins og ekkert hafi í skorist? Best væri að bakka alveg á stig 1 en ég treysti mér ekki til þess í þessu nautahakksríki. Flýta stigum, ss. bæta fleiru inn (fyrr) og bakka svo e.t.v. þegar heim er komið? Eða svissa strax út af inngangi og inn í sætuefna- og hnetulaust GAPS? Með sætuefnum er m.a. átt við hungang og fleira. Ég á erfitt með að átta mig.

Ég er virkilega þjökuð af sætindaþörf - var það aldrei heima. Ég veit að þetta er ,,die off"- ég veit bara ekki af hverju það er svona svæsið núna. Veit ekki hvort ég nenni að díla við það, ofan á allt annað.

Eiginlega hef ég ekki nógan tíma heldur til að lesa mér til um þetta. Litlu krílin mín þurfa - og eiga að fá - mikla athygli. Þetta er jú fríið þeirra líka. Ég hef ekki verið nógu dugleg að gefa þeim af tíma mínum, enda atvinnuleit efst á forgangslistanum núna. En barnapían fer í lok vikunnar og þá reikna ég með að helga þeim megnið af mínum tíma (það er að segja, þeim og eldamennskunni endalausu).

Matseðillinn

Morgunmatur: Kássa (maukuð fyrir hana, ómaukuð fyrir mig)

Hádegismatur: Kássa (maukuð fyrir hana, ómaukuð fyrir mig - ég snæddi mína með puttunum (!) á jarðlestarstöðinni við Þjóðleikhúsið af því að ég hafði gleymt að taka með gaffal og ég var mjög svöng!)

Síðdegisverður (bara hún): Maukuð kássa

Kvöldmatur: Ofnsoðin íslensk ýsa (sem við fengum gefins) með sjávarsalti, pipar og ferskri basiliku. Meðlæti: Soðin gul paprika, laukur og kúrbítur ásamt með lárperumauki.

Ekkert soð í dag. Fyrsti dagurinn á inngangi án soðs - þetta á ekki að gerast!

Ekkert bað heldur.

Dagur 35

2010-07-12T20:09:00.003Z

5 vikur. Þar af hefur sú síðasta verið sú langsamlega erfiðasta, stormasamasta og ómarkvissasta af öllu þessu brasi.

En í dag horfði allt til betri vegar.

Númer eitt, tvö og þrjú: Heilsan var betri. Bæði barnsins og mín, andleg og líkamleg.

Fjöllum aðeins um barnið fyrst:

Hún var sæmilega stemmd í allan dag. Reyndar var ég bara með henni til kl. 14.00 og svo í örstutt augnablik síðdegis. Á þessum tíma myndi ég segja að hún hafi verið nokkuð róleg og jöfn, kannski ívið viðkvæmari en hún er vön, stutt í tárin. Samt allt önnur en í gær. Ég reyndi að pumpa barnapíuna um ástandið á henni þegar ég var ekki til staðar og hún sagði bara að hún hefði verið ágætlega stemmd. Hún hefur alveg séð hana í vondum ham, þannig að hún ætti að vera dómbær.

Dóttir mín kúkaði ekki fyrr en eftir að ég var farin og samkvæmt barnapíunni voru hægðirnar með betra móti, mér gekk reyndar ekki alveg nógu vel að fá hjá henni smáatriðin... fólk á víst misauðvelt með að lýsa hægðum...

Hvað mig varðar þá var maginn á mér líka til mikilla muna betri í dag. Þó er nokkur fyrirferð í honum núna, eftir að ég fékk mér síðbúin kvöldverð. Ekkert á við í gær, samt.

Það skal tekið fram að ég fór mjög varlega og var ekki með neitt sérstaklega krassandi á matseðlinum. Þó játa ég á mig þá fáheyrðu nýungagirni að hafa látið undan einhverri fjölbreytnifíkn í mér og búið til kjötbollur sem ég hef ekki gert áður á innganginum. Gætti þess þó að hafa þær mjög inngangsvænar. Myndi segja svona stig 3... Allavega; hér er uppskriftin (ef ég skrifa ekki uppskriftir niður strax þá gleymi ég þeim, þessi er eftir besta minni frá því í dag...) :

800 grömm nautahakk

1 meðalpenn brokkólíhaus

1 venjulegur laukur

2 hvítlauksrif

1 lítill viskur af graslauk

Sjávarsalt

Svartur pipar

Aðferð

Sauð spergilkálið og laukinn í potti í smástund.
Sturtaði öllu saman í skál, soðna grænmetinu, hvítlauknum, graslauknum, saltinu og piparnum.
Maukaði allt með töfrasprotanum mínum. Mæli ekki með því, hefði notað matvinnsluvél ef ég hefði haft eina slíka við hendina. Töfrasprotinn bræddi nærri því úr sér...
Mótaði litlar bollur með höndunum.
Eldaði á tvo vegu:

a) setti fyrstu bollurnar í eldfast form, álpappír yfir og bakaði / sauð í eigin vökva við 200°c (ath. ekkert sem soðið er á þennan hátt á inngangi má vera of lengi í ofninum, þá fer það að brúnast, þrátt fyrir álpappírinn)

b) setti restina ofan í sjóðandi vatn og sauð ekkert svo lengi, kannski 10 mín. eða kortér.

Þetta varð bara ljómandi. Inngangshetjan mín spændi þetta í sig.

Númer 4: Fjárhagurinn.

Matarkostnaður var áfram hár í dag. Verslaði í morgun í verslun sem heitir Kiwi og á að heita ódýr. Alls um 8.000 kr. ísl. fyrir hakk, lax, grænmeti og vatn - og múslí og haframjöl fyrir barnapíuna.

Fann svo síðdegis loks Rema 1000 búð - en það er keðja sem ég verslaði grimmt í þegar ég bjó hér í gamla daga, enda voru þetta ódýrustu búðirnar þá. Í Rema reyndist hakkið til mikilla muna ódýrara... en reyndar líka ólystugara. Það var grátt á litinn. Ég hugsaði samt með mér að það væri vel hugsanlega náttúrulegri litur sem jafnframt benti til minni aukaefna en þessi fagurrauði og keypti það því ótrauð. Kílóverðið á því sem ég kaupi venjulega er svona 1.700.- til 2.000.- ISK, en gráa hakkið kostaði 1.200.- Það kemur í ljós á morgun hvort það er yfir höfuð ætt, þó að ég muni náttúrlega aldrei fá að vita hvað raunverulega er eða er ekki í því...

Matseðillinn

Morgunmatur minn: Fáeinar skeiðar af kássu og 2 egg

Morgunmatur barnsins: Öll kássan sem eftir var

Hádegismatur okkar beggja: Kjötbollur og soðin paprika og gulrætur (og lárperur fyrir mig)

Síðdegisverður okkar beggja: Restin af kjötbollunum og fjölbreyttari blanda af soðnu grænmeti (þ.m.t. laukur)

Aukasíðdegisverður barnsins: Kássa

Kvöldmatur: Ofnsoðinn lax með soðnum gulrótum og rauðum paprikum

Engin böð

Kjötsoð: Restin af nýsjálenska sauðasoðinu

Dagur 34

2010-07-11T19:26:00.004Z

Vá, maginn á mér er í henglum. Veit ekkert hvað ég á að gera. Ef ég væri heima myndi ég

a) fá mér meira kjötsoð, alveg upp í 6 - 10 bolla á dag

b) trappa niður á stig 1, bara ofnsoðinn kjúlla (eða annað kjöt / fisk) og grænmeti fyrir mig takk...

Ef ekki myndi skána fljótt myndi ég e.t.v. bæta við stólpípu.

... en ég er hér. Í rándýra útlandinu. Fjarri aukaefnalausum Ali-kjúklingi, heildsölukjötinu og grænmeti á viðráðanlegu verði. Ég hélt ALDREI að þetta yrði svona erfitt!!!

Maginn minn er svo gersamlega á hvolfi. Í morgun sveið mig í magann - áður en ég fékk mér morgunmat. Afsakið upplýsingarnar en ég hef líka verið með ærlegan niðurgang. Endalaust RUMBLING. Og allhressan vindgang. Það er ekki eins og ég geti leitt þetta hjá mér neitt...

Dóttir mín átti einnig afar slæman dag í dag. Hún var strax með linar og losaralegar hægðir í gærkvöldi. Þær héldu áfram í dag. Framan af degi var hún sæmilega stemmd. Veðrið var þokkalegt í morgun og þær léku sér úti. Svo fór hún að verða sífellt argari við litlu systur sína uns hún var seinni partinn farin að öskra á hana af minnsta tilefni. Hún var eirðarlaus, með kjánastæla og kjánahláturinn skemmtilega, gat ekki setið kyrr, kom með dónaleg og fjandsamleg komment upp úr þurru og svo mætti lengi telja. Í raun bara stór afturför. Óþægilega svipuð hegðun og fyrir GAPS.

Svona hegðun hefur af og til skotið upp kollinum eftir að við byrjuðum á GAPS. En þó ekki neitt í líkingu við það sem áður var, þegar oft var hreinlega ekki hægt að ná sambandi við hana og hún var gersamlega snælduóð.

Þannig að ég bauð henni í prívatgöngutúr með mér, bara ég og hún, núna síðdegis. Fórum út í búð, sem auðvitað var lokuð því allt er lokað í Norge á heilögum hvíldardegi ;-)

Fórum í gegnum skóginn. Skoðuðum snigla og töluðum saman. Sáum meira að segja íkorna með ungann sinn í fanginu. Algert krútt.

En stýrið mitt var áfram stúrið. Hafði allt á hornum sér. Hafði óbærilegan hlaupasting. Var heitt, var kalt, var blaut á tánum... (24 gráðu hiti og mikill raki - rigning yfir miðjan daginn), var þreytt, nennti ekki að labba, fannst langt í búðina...

Svo þegar heim var komið var henni boðið að eiga myndsamtal við föður sinn á Skype. Það fór ekki vel, hún var á iði, fiktandi í tölvunni, blokkandi myndavélina, truflandi systur sína og þegar ég kallaði hana til mín til að ræða við hana snappaði hún. Ég fór með hana í ,,einvist" sem er refsing sem fátítt er að þurfi að grípa til núorðið. Allavega sú fyrsta í þessari ferð og eflaust sú fyrsta á Inngangsferlinu og þótt lengra aftur í tímann væri litið.

Það tók hana drjúga stund að róa sig í einvistinni. Hún öskraði úr sér lungun.

Hún var lystarlaus í kvöldmatnum en fékk svo ákafan magaverk, kveinaði og stundi og kvaðst þurfa að gubba. Hékk um stund á vaskbrúninni með eymdarsvip (systir hennar var að nota klósettið).

Þannig að:

a) Ofnbakaðar andabringur

b) Lárperumauk og

c) Hydrocortisone

liggja undir grun.

Í ofanálag erum við aftur orðin matarlaus. Það sem eftir er af 22.000 króna kaupunum eru fáein epli og appelsínur og bananar (fyrir yngra barnið og barnapíuna), 5 lárperur, ca 3 lítrar af vatni (við keyptum 8) og 12 egg. Smá kássa - ætti að duga í morgunmat. Jú svo keypti ég líka baneitraðar þvottavélartöflur í búðinni (ekkert annað í boði).

Matseðill dagsins

Morgunmatur minn: 2 linsoðin egg og grænmeti

Morgunmatur barnsins: Maukuð kássa

Síðbúinn morgunmatur barnsins (við vöknuðum svo snemma): Maukuð kássa

Síðbúinn morgunmatur minn: 1 linsoðið egg og grænmeti

Hádegismatur: Ofnsoðið lífrænt nautakjöt með gulrótum og papriku fyrir alla, blómkáli með gheei og lárperumauki fyrir mig og litlu systur

Síðdegisverður: Kássa (maukuð fyrir hana, ómaukuð fyrir mig)

Kvöldmatur minn: 2 linsoðin egg, smá kássa og smá eggjahræra með kássublandi og andafeiti

Kvöldmatur barnsins: Maukuð kássa (borðaði lítið)

Engin böð.

Soð: Sauðasoðið áfram.

Svona eftir þennan dag er ég ekki mjög upplitsdjörf. Heilsan mín... heilsan hennar... fjárhagurinn... það er eins og þetta sé allt að fara úr böndunum...

Dagur 33

2010-07-10T20:28:00.006Z

Vitið þið hvað?

Ég er alvarlega að íhuga að taka U-beygju út af innganginum. Ja hérna hér. Á dauða mínum átti ég von... en varla að ég myndi játa mig sigraða svo snarlega...

... en þó ekki endilega snarlega.

Fyrirhöfnin er brjálæðisleg og vegna aðstæðna og þess hráefnis sem ég er að finna hér er hún enn meiri en heima. Var ég ekki örugglega líka búin að nefna það hvað ég er enn, á köflum, orkulaus, dofin í hausnum, úthaldslaus og slöpp? Að ekki sé minnst á kostnaðinn sem er alveg að sliga mig. Að þurfa að kaupa ferskt og aukaefnalaust kjöt og grænmeti í stórum stíl (við erum alltaf svangar) er alveg að fara með fjárhaginn, sem ekki var nú svosem neitt góðæris- fyrir. Að meðaltali hefur maturinn okkar hér úti, undanfarna viku, kostað á milli 6000 og 7000 ISK á dag. Á DAG!!!

Það gerir um 210.000.- á mánuði. Glætan að ég hafi efni á þessu rugli! Það er ekki eins og ég sé að kaupa neina handplokkaða franska snigla eða sérveiddar mörgæsir frá suðurskautslandinu - aðallega bara hakkið sem virðist hvað hreinast hverju sinni og smá kjúlla. Brokkólí, papriku, kúrbít, blómkál og gulrætur. Jú og svo smá lauk. Egg og avókadó. Og drykkjarvatn, þar sem hreint vatn er mikilvægt á GAPS. Ég kemst bara ekki hjá því að hugsa með mér að það væri e.t.v. ódýrara ef ég gæti bætt fleiru við, t.d. möndlum, fræjum og slíkum afurðum, e.t.v. ávöxtum og svona. Allt er þetta reyndar fáránlega dýrt hérna en fyrirhöfnin væri kannski minni. Ég er enn að nota hnetur og möndlur sem ég kom með að heiman til að gera möndlumjólk og brauð fyrir yngra barnið mitt. En kannski er ég bara að gefast upp og leita að átyllum.

Ég viðurkenni að í þetta ár (bráðum) sem ég hef undirgengist GAPS-meðferð hef ég bara alls ekki verið ósátt við það. Man varla eftir skiptum þar sem ég hef horft öfundaraugum á fólk borða eitt eða annað sem ekki er leyfilegt fyrir mig, andað að mér angan að einhverju fersku eða nýbökuðu sem ég má ekki fá og látið mig dreyma, kvalist af löngun í eitthvað sem ég bara má ekki snerta...

... ég hef bara hreint út sagt verið öfgasátt á GAPS. Alltaf að borða einhverjar krásir og kræsingar, fullt af mat sem okkur finnst góður. Vinnan er reyndar ansi mikil, en vel þess virði. Dóttir mín hefur líka verið hæstánægð á GAPS enda finnur hún á sér mikinn mun og elskar þær kræsingar sem við höfum verið að reiða fram. Ég hef stundum sagt að hún sé heimsins besti kynningarfulltrúi fyrir þetta mataræði.

En núna er þetta einhvern veginn öðruvísi. Kannski af því að ég er aldrei almennilega södd. Fæðan sem snædd er á inngangi er svo auðmeltanleg að fólk borðar oft margfalt meira en það er vant þessar fyrstu vikur. Við mæðgur höfum þannig léttilega hesthúsað um 2 kg af kjöti (saman), til viðbótar við grænmeti og kjötsoð, hvern dag áður en við lögðum af stað í ferðalagið. Jafnvel meira. Merkilegt alveg. Núna er ég hins vegar alltaf að spara, ekki bara pening, heldur líka fyrirhöfn og einhvern veginn verð ég sjálf útundan og er aldrei alveg södd. Það tekur líka svo mikinn tíma að borða og ég er alltaf með stelpurnar (báðar), mikið ein og reyni að nota sem mest af tíma mínum í virka atvinnuleit af öllu mögulegu tagi. Þó að ég fylli stórt nestisbox fyrir sjálfa mig þegar ég fer að heiman, þá verð ég aldrei södd af innihaldi þess.

Þannig að kannski er það út af þessu sem ég er brjálæðislega óhamingjusöm þessa dagana þegar ég labba fram hjá kaffihúsum og veitingastöðum og finn lokkandi matarilm... ef ég hefði verið svona í heilt ár væri ég löngu orðin geðveik og/eða dottin oní pizzu, rjómatertu og lakkrís (tja, bara svona til að taka dæmi...).

Ég er svolítið að spá í BED nálgun á GAPSið... sem er kannski bara rugl. Þess má geta að ég er svöng núna, en ég ef læt það eftir mér að borða þá klára ég nestið sem ég ætlaði mér fyrir morgundaginn og ef ég geri það þá þarf ég að spandera hakki morgundagsins strax og þá þarf ég að kaupa enn meira hakk fyrir mánudaginn... þvílíkt endemis vesen (en dæmigert fyrir þetta daglega ástand).

Þannig að ég gerði það eina skynsamlega í stöðunni í dag. Ég gaf skít í háskólagráðurnar mínar þrjár og sótti um starf í heilsubúð. Ég meina, ef ég vinn í heilsubúð, þá fæ ég allavega afslátt af einhverju af þessu góssi... ekki satt?

Fékk mér sauerkrautsafa og agnarögn af kókosolíu með morgunmatnum. Mjög huguð, semsagt.

Maginn minn er enn mjög furðulegur frá því í fyrradag þegar ég borðaði lummuna og sykursvínið. Hann er bara einhvernveginn endalaust ,,rumbling" - ég finn ekkert viðeigandi íslenskt orð fyrir það. Fyrst var mér líka smá illt, en síðan bara þessi hryllilega fyrirferð sem ég veit ekki hvað skal kalla.

En já, ég gerði fleira skrítið í dag. Fór í búð með dætur mínar í morgun. Valdi sérstaklega dýra búð af því að skv. upplýsingum á heimasíðu fyrirtækisins sem framleiðir lífræna smjörið (það eina sem ég hef fundið hér) átti það (smjörið) að fást þar. En svo reyndist ekki vera. Snuð.

En ég fann samt lífrænt kjöt. Og svo fann ég nokkuð sem ekki var lífrænt en virtist frekar hreint. Hvað veit maður samt (sbr. sykursvínið)...

... í augnabliksveikleika henti ég þessari kjötvöru í kerruna ásamt fleiru. Var samt meðvituð um verðið, ekki nema um 8.000.- (ISK) kílóið, eða um fjórfalt verðið á nautahakkinu góða. Veit ekki hvað kom yfir mig og get ekki skýrt það með öðru en stundarbrjálæði, e.t.v. undir áhrifum frá öllu fjárhags-, heilsu- og tímaálaginu...

Og svo fór ég heim. Síðdegis byrjaði ég að elda. Þegar ég var búin að pakka utan af viðkomandi vöru fattaði ég að til þess að hún fái virkilega að njóta sín er alveg útilokað að ,,ofnsjóða" hana. Eins gæti ég bara keyrt yfir hana. Þannig að nú voru góð ráð dýr... átti ég að skemma rándýru vöruna (með illri eldunarmeðferð) eða stökkva upp um stig á innganginum (upp á stig 4)???

Ég var, nota bene, búin að opna umbúðirnar. Og ég vil meina að við mæðgur höfum bara einfaldlega átt skilið smá dekur. Þannig að við blönduðum stigum dálítið í dag. Sennilega ekki gott fyrir okkur. Mjög linar hægðir hjá dóttur minni í kvöld. En samt... mmmmh....

Matseðillinn

Morgumatur minn: 2 linsoðin egg og soðið grænmeti (1 tsk sauerkrautsafi, 1/2 tsk kókosolía)

Morgunmatur barnsins: Rest af kjúklingi og grænmeti frá því í gær

Hádegismatur minn: 1 linsoðið egg og grænmeti

Hádegismatur barnsins: Nautahakkskássa með lauk

Síðdegisverður: Ofnbakaðar andabringur með lárperumauki og soðnum gulrótum og paprikum

Kvöldmatur: Nautahakkskássa (maukuð fyrir börnin, ómaukuð fyrir mig).

Engin böð (nema sturta)

Kjötsoð: Nýsjálenskt sauðasoð (framhald frá því í gær)

Þess má svo að lokum geta að andabringurnar voru bara tvær, við hefðum farið létt með þrjár eða fjórar. En við vorum allar vel undirbúnar fyrir þessa stund, hlökkuðum mikið til, vorum alveg í rétta hátíðargírnum, komum okkur vel fyrir í sólinni út á verönd og nutum hvers einasta bita...

Dagur 32

2010-07-09T20:22:00.004Z

Það var sól í Osló í dag. Brakandi blíða. Nóg af D-vítamíni. Nema ég hafði stelpuna í langerma, veit ekki hvernig sól í gegnum hydrocortisonfilmu virkar á kerfið...

Ég er með smá í maganum vegna matar. Er jafnvel að spá í að svissa af inngangi yfir í sætuefnalaust GAPS, sem sumir hafa víst notað í meðferðarskyni með góðum árangri. Veit samt ekki nóg til að geta skipt bara si svona, þannig að við höldum áfram enn um sinn.

Hydrocortison túpan er búin og ég keypti nýja í dag. Stórir hlutar húðarinnar á ljósinu mínu frábæra eru orðnir alveg heilir. Til dæmis er hægri olnbogabótin alveg stráheil. Furðulegt. Úlnliðir og fótleggir gróa hægar og andlitið er svolítið flagnað.

Ég er líka hugsi vegna hússins sem við dveljum í núna. Ekki svo að skilja að ég sé ekki í raun sallafegin að hafa yfir höfuð húsnæði hér á meðan á atvinnuleit stendur. Það er í raun lúxus. En það er ekki í lagi að vera alveg að kafna á hverjum morgni. Ég lofta út allan liðlangan daginn - það hjálpar. Efri hæðin er líka merkjanlega skárri. Svo eru hér fínar svalir sem sólin skín á frá morgni til kvölds, gott að nota þær. Fyrir þá sem ekki vita er útiloft besta ,,lækningin" við einkennum af völdum myglusveppa eða hvers konar húsasóttar.

Morgunmatur minn: Egg og soðið grænmeti

Morgunmatur barnsins: Svínakjötskássa gærdagsins

Hádegismatur barnsins: Nautakjötskássa

Síðdegismatur allra: Ofnsoðnar, ógeðslegar, ólseigar og ólystugar lambakótilettur frá Nýja-Sjálandi (já, það er erfitt að finna út hvað er hægt að kaupa hér og hvar!!!). Meðlæti: Brokkólí, blómkál og nýjung (stig 3): Laukur svissaður í dýrafitu.

Kvöldmatur: Ofnsoðnar kjúklingabringur, brokkólí, blómkál og kúrbítur (ég fékk mér líka lárperu / avókadó).

Engin böð sem heitið geta (á ég virkilega að telja sturtu með...?!)

Kjötsoð: Lambakótilettusoð - pjæ

Dagur 31

2010-07-08T20:43:00.003Z

Barnið hagaði sér eins og engill í dag, enda til mikils að vinna - lumma í boði að launum.

Matseðillinn

Morgunmatur minn: Linsoðin egg, soðið grænmeti og ofnsoðinn kjúklingur með grænmeti

Morgunmatur barnsins: Ofnsoðinn kjúklingur með grænmeti

Hádegisverður minn: Ofnsoðinn kjúklingur með grænmeti

Hádegis- og síðdegisverður barnsins: Svínahakkskássa

Kvöldverður: Ofnsoðinn lax með fersku dilli, soðnar gulrætur og blómkál með (ég fékk mér líka lárperu).

Kvöldverðurinn var mjög, mjög góður. Ég hef samt enga tryggingu fyrir því að laxinn hafi verið alveg hreinn.

Eftirréttur: 2 langþráðar möndlusmjörslummur fyrir barnið. Ein fyrir mig. Hún var ekki góð. Henti restinni af henni. Held að ferðalagið hafi ekki farið vel með þetta deig. Geri nýtt við tækifæri.

Kjötsoð dagsins: Mjög frumstætt kjúklingasoð... lítið krassandi.

Engin böð.

Maginn á mér er búinn að vera með uppsteit í allt kvöld, það byrjaði út af lummunni.

Svo var ég að fara að gera nesti fyrir morgundaginn og það er eiginlega klúður dagsins. Sko, ég er að reyna að kaupa ferska matvöru, gjarnan ódýra. Líka að bjóða upp á smá fjölbreytni. Þetta er ekkert grín, sko. Þannig að ég álpaðist til að kaupa svínakótilettur, hafandi velt þeim á alla kanta og innihaldslýsingin nefndi ekkert nema svínakjöt.

Auðvitað veit ég betur - ég veit að það er oft eitt og annað í kjöti sem ekki er um getið. Sykursprautun er t.d. mjög vinsæl. En á hinn bóginn; hvað get ég gert?

Ansans... allavega, ég hefði ekki átt að kaupa þetta kjöt. Ég bara ákvað að vera æðrulaus. Smellti því í ofninn í kvöld, fór svo að gera annað. Tók það út og ætlaði að brytja niður fyrir mig í nesti og fyrir barnið í máltíðir morgundagsins. Byrjaði að brytja, smakkaði smá og þá rann á mig æði. Áður en ég vissi af var ég búin að tæta í mig megnið af heilli kótilettu. Tek fram að ég var / er orðin þreytt og var annars hugar. Fattaði svo allt í einu hvað ég var að gera. Það var lokkandi dísætt bragð af kjötinu, alls ekki það sem ég er vön sl. 11 mánuði. Úff. Vökvinn í eldfasta mótinu eins og síróp.

Ansans.

Þannig að... ég sópaði öllu í dall fyrir barnapíuna. Hún verður jafnframt að útbúa mat fyrir barnið á morgun. Ég fiskaði mauksoðna kjúklingabita upp í dall fyrir sjálfa mig - mun gæða mér á þeim í nesti á morgun, ásamt með ofnbökuðu grænmeti. Ógeðslega ógirnilegt... en hey. Betra en sykur.

Og útbrotin hörfa enn. Samt ekki enn alveg farin og túpan að verða búin. Ætli þau fari ekki alveg?

Dagur 30

2010-07-07T20:42:00.002Z

Goddag, goddag.

Nú hefur sterakrem verið borið þrisvar á húð barnsins. Húðin er öll önnur. Strax í morgun (eftir eina áburðarumferð) var glögglega greinanlegur munur. Mér var mjög létt.

Sjálf segist hún ekki viss. Klæjar enn svolítið og kroppar mikið í flagnandi skinn.

En bíðum nú við. Ég var svosem ekki með hana mikið í dag, þar sem lunginn úr deginum fór í atvinnuleit. En barnapían tilkynnti nýjar hæðir í óþekkt og ,,ofvirkni" eins og hún orðaði það. Sjálf varð ég undir kvöldið vör við smá skapgerðarbresti sem ekki hefur mikið bólað á upp á síðkastið, til dæmis geðveikislegan kjánahlátur og fleira gamalkunnugt. Ég tek það fram að ég átti ekki von á neinu svona, allrasíst strax og það var ekki fyrr en ég ræddi við barnapíuna að á mig fóru að renna tvær grímur. Samt... það er of snemmt að álykta neitt. Við sjáum hvað setur. Hún hafði hægðir í morgun, þær voru ekki fullkomnar eins og í undanfarin skipti, en það þarf ekki að þýða neitt sérstakt heldur. Látum ganga fyrir núna að ná húðinni í samt lag.

Matseðillinn

Morgunmatur barnsins: Ofnsoðnar kjúklingabringur í grænmeti

Morgunmatur minn: Ofnsoðnar kjúklingabringur í grænmeti, nokkrir bitar af lífrænni lárperu og 2 linsoðin egg.

Hádegismatur minn (snæddur á sporvagnsstoppistöð við Trondheimsveien): Ofnsoðnar kjúllabringur í grænmeti

Hádegis- og síðdegisverður barnsins: Maukuð nautahakkskássa

Kvöldverður minn: Ný nautahakkskássa

Kvöldverður barnsins: Nýja nautahakkskássan maukuð

Soð dagsins: Síðustu droparnir af kjúklingabeinasoðinu - og nú erum við uppiskroppa

Ekkert bað en ég setti egg í hárið á henni í kvöld (þvoði semsagt hárið)

Dagar 27 - 29

2010-07-06T21:06:00.003Z

Fyrst vil ég biðjast velvirðingar á þessu hléi sem varð vegna ferðalaga, álags og annarra illviðráðanlegra orsaka. Sérstaklega vil ég biðja Hildi forláts, enda veit ég ekki dyggari áskrifanda að öllu sem ég læt frá mér - og sem þar að auki á það til að taka því illa þegar ég tek mér hlé ;-)

En hvar skal byrja nú?

4ra vikna markinu var náð í gær. Engin hátíðahöld.

Á bátnum á sunnudaginn var voða gaman hjá krílunum, fullt af leiktækjum og dóti, alger paradís fyrir unga. Sú minni missti út úr sér nokkur gersamlega óborganleg gullkorn sem ég mun fúslega deila með þeim sem áhuga hafa - en á öðrum vettvangi.

En gamanið kárnaði þegar farið var að sofa. Eldri dóttir mín var viðþolslaus af kláða. Hún var á iði alla nóttina og gekk illa að festa blund. Um fjögurleytið lét ég hana fá koddann sinn (hún hafði krafist þess að fá að sofa með bátskodda), lét hana pissa, drekka, smurði hana eina ferðina enn með einu af þessum gagnslausu kremum sem við höfum verið að burðast við að nota og las fyrir hana um stund. Þá loks sofnaði hún.

Til þess að rekja þróun þessara útbrota þá hélt hún bara áfram að vera slæm, slæmari og slæmust í gær þar til ég var komin á barm taugaáfalls hér í gær af áhyggjum, kvíða og vanmætti vegna útbrotanna. Makaði á hana leir úr lóninu fyrir norðan sem ég hef burðast með mér alla leið hingað til Oslóborgar. Ekki mikil áhrif að sjá.

Leitaði í öngum mínum til þeirra sem mesta reynsluna hafa í útlöndum. Fékk heilan hafsjó af ráðleggingum. Í stuttu máli varð það ofan á að kaupa handa henni hydrocortisone - sem, já - eru sterar - milt sterakrem reyndar, en sterar engu að síður.

Og nú, lesendur góðir, skal ég útskýra smá fyrir ykkur:

Ástæða þess að dóttir mín er með útbrot er að líkaminn losar eiturefni í gegnum húðina. Holl og heilandi fæða, svo sem bara kjötsoð - og enn frekar kókosolía, gerjuð matvæli (súrkálssafi og þannig), grænmeti, ávextir og fleira ýta undir slíka hreinsun. Þegar hún borðar ekki (t.d. í upphafi inngangsins, eða á meðan á gubbupestinni stóð) er lítil úthreinsunarvirkni og því skána útbrotin rétt á meðan. Harðkjarna hómópatar gefa engar remedíur við útbrotum þar sem litið er á útbrot sem nauðsynlega úthreinsun.

Það er mjög algengt að útbrot versni fyrstu mánuðina / árin á GAPS, í hvert sinn sem líkaminn er að takast á við nýjar hreinsanir.

Með því að meðhöndla húðina með sterum er ég að loka þessri útgönguleið eiturefna út úr líkamanum og reka þau lengra inn. Það hægir á og jafnvel spillir fyrir bata. Langbesta leiðin til að meðhöndla svona ástand væru mörg og tíð böð í náttúrulegum vötnum og sjó, eplaediki, Epsom salti og svo framvegis. Ég á hins vegar ekki kost á slíku þar sem ég er nú. Og ég er í öngum mínum vegna ástandsins á barninu, sem nota bene spillir líka talsvert ferðinni fyrir okkur öllum.

Þannig að... stórhættulegir sterar eru málið í dag. Ég vonast til að ná útbrotunum niður. Hætti að gefa henni kókosolíu rétt á meðan. Gaf henni 1 tsk af sauerkrautsafa í dag, eftir langt hlé, en svo verður ekki meira þannig fyrr en við komum heim.

Ég er búin að panta rándýrt þangduft til að setja í bað fyrir hana þegar ég kem heim, að undirlagi minna sérlegu ráðgjafa. Bæti því við Epsomið og allt hitt. Verst að hún hatar böð... en jæja, ég reyni að gera henni þau bærileg með lestri og fleiru.

Ég nenni ekki að fara í mörg smáatriði hér í þessari færslu. Ég er mun upplitsdjarfari í dag en í gær, eftir að hafa tekið - og sæst við - þessa ákvörðun. En ég er samt úrvinda og örþreytt eftir endalaust eldhússtúss sem tekur brjálæðislega mikið af mínum dýrmæta tíma.

Ég bætti avókadói inn í fæðuna mína í dag. Held að það gangi betur nú en síðast, en það er nota bene lífrænt núna.

Ég leitaði til konunnar sem þýddi gulu GAPS-bókina eftir uppl. um hvar ég get keypt GAPS-ket og fisk hér í Noregi, en hún hefur ekki svarað. Á meðan hef ég fundið lífrænt nautahakk og ,,100% hreinar" kjúklingabringur sem kosta svívirðilega mikið (eins og allt hér) og notast við þetta í bili.

Húsið sem við erum í er dálítið gamalt, kjallarinn er ekki mjög heilsusamlegur, mikil myglustækja á baðherberginu þar, en rest virðist ásættanleg (gæti þó alveg lifað án silfurskottnanna á hinu baðherberginu). Hverfið er barnvænt og í útjaðri borgarinnar = gott loft.

Ég var samt með bólgnar varir þegar ég vaknaði í morgun.

Er aaaaalveg að verða uppiskroppa með soð. Veit ekki hvernig ég leysi það.

Er undir miklu áreiti frá moskítóflugum akkúrat núna, þannig að yfir og út í bili!

Dagur 26

2010-07-03T21:01:00.002Z

Jæja...

... engin lumma i dag.

Utbrotin eru ekki i godu asigkomulagi.

Thessi dagur var i senn hrædilegur og dasamlegur.

Thad hrædilega var ad eg er alveg ad gefast upp gagnvart utbrotunum. Allt annad er fullkomlega i bloma hja barninu. Hvernig i oskøpunum geta thessi utbrot verid svona illvidradanleg???

Thad dasamlega var ad vid stelpurnar svafum agætlega i nott, hitinn var kominn upp i 27 stig skømmu eftir fotaferd og vid attum fullkomlega yndislegan dag med systurdottur minni i Tivoli.

Thad voru kjuklingar og kassa i Tivolinestinu fyrir tha eldri, svinalundir og grænmeti fyrir mig. Appelsina og banani fyrir krilid... sem hefur reyndar ekkert med innganginn ad gera - og er ekki einu sinni gott sem middegismaltid a fullu GAPS-fædi... en hallo, thetta var Tivoli.

Fult ad geta ekki gert betur matarlega sed vid eldri dotturina. En hun fekk virkilega ad vera prinsessa i dag og rada ferdinni. For i svo til øll tæki sem voru i lagi fyrir hennar hæd og oft i mørg theirra. Afinn hafdi gefid fe til ferdarinnar og eg held ad thad hafi bara ad mestu notast upp... a eftir ad reikna thad betur ut vid tækifæri.

En thetta var semsagt eiginlega matsedillinn i dag, i morgun fekk hun svinalundir lika og filadi thær ekki vel og svo fekk eg tvø linsodin egg.

Sod dagsins: Kjuklingabeinasod.

Bad dagsins: Ekkert bad... (nema eg for i stutta sturtu i morgun)

Dagar 24 og 25

2010-07-02T22:56:00.003Z

Ubbs, eg skrifadi ekki i gær. Fyrsta skiptid sem eg klikka.

En eg hef alveg afsøkun. Brjalad ad gera.

Stutt upprifjun:

Klukkan fjøgur i fyrrinott vaknadi dottir min og lysti thvi yfir ad hun væri svøng. Hundrad villtir hestar hefdu ekki getad dregid mig fram ur a theim timapunkti, en eg var samt oheyrilega glod ad heyra ad hun væri komin med lyst. Hun sagdi lika ad ser lidi ,,venjulega". Thvilikur lettir.

Svo svafum vid til sex eda sjø.

Eg var a fullu allan daginn i gær i alls kyns tiltekt og skipulagningu. Malid er nefnilega ad eg skipti a ibudinni minni og ibud i Noregi. Thvi var eg ad vanda mig ad gera allt i stand fyrir folkid sem kemur og gistir i minni. Svo er lika heilmikid mal ad pakka og undirbua fyrir tvær manneskjur a inngangsfædi, i kreppu thar ad auki.

Thad var lika brjalædi i dag. Munadi mjou ad eg yrdi of sein bara. Fulast er ad siminn minn hvarf. Litid vid thvi ad gera, eg er bara simalaus i utlandinu.

En allavega... vid erum i Køben nuna og høfum thad agætt. Eg er gersamlega urvinda og børnin sofnud.

Dottir min vard fin af utbrotunum thegar a) hun var lystarlaus og gubbandi og b) hun for oft og titt i Blaa lonid (for m.a. i gær). Er hins vegar strax verri i dag. Kannski var rangt af mer ad gefa henni prufulummu i gær (= stig 3). Lumman for illa i mig. Markmidid var hins vegar ad undirbua eitthvad uppabrot fyrir tivoliid sem ætlunin er ad fara i her uti. Hun var mjøg anægd, en eg veit ekki nema lumman hafi eitthvad spilad inn i. Utbrotin eru allavega verri nuna en i gær. Eiginlega finnst mer bara ad thau seu slæm ef hun a annad bord neytir fædu...

Jæja, stutt um matsedilinn...

Fyrir utan bara thetta venjulega, svinalundir og kjulla og grænmeti tha fengum vid lummu i gær, eina hvor, an eggs (innihald: bara sodinn kurbitur og møndlusmjør). Svo var lax og raudspretta i kvøldmat, en su stutta fekk ser af hvorugu. Var ad borda annad og eg nennti ekki veseni.

Bad gærdagsins: Hun for i lonid og eg bara i sturtu...

Sod gærdagsins: Kindabeinasod med grænmetissodi

I dag: Sodin kjuklingalæri og grænmeti i morgun, svo kassa i hadeginu og kjuklingaleggir i fluginu og nuna i kvøld.

Barnid fekk lika 1 tsk af kokosoliu.

Bad dagsins: Ekki neitt

Sod dagsins: Rest fra thvi i gær.

Dagur 23

2010-07-01T00:48:00.002Z

Ókey... ég svaf afar lítið, illa og slitrótt þarna í nótt. Hef ekkert getað lagt mig í dag. Brjálað að gera við að undirbúa brottför af landinu (því miður ekki varanlega í þetta skiptið). Nú er klukkan að verða eitt og ég enn ekki farin að sofa og fer að jaðra við óráð... þannig að nú skal gera stutta færslu.

Yngri inngangshetjan á heimilinu var ansi lasin í dag. Svaf að megninu til til kl. 13.00 eða svo. Horfði svo á myndefni í miklum mæli. Fékk kvöldmat kl. 18.00. Langaði meira að sofa. Sagðist þurfa að kúka en gat það svo ekki, sagðist ekki megna að ,,rembast". Fékk stólpípu. Hresstist allnokkuð við. Reyndi að leggja sig, en gat ekki hvílst. Gubbaði um áttaleytið. Fékk smá kjötsoð í viðbót og gubbaði aftur (fékk alls 3 x kjötsoð í dag, smá kássu í kvöldmat og svo vatn. Ekkert annað).

Hún var með 37,9°c sem telst nú ekki mikill hiti. Ég hef samt af henni miklar áhyggjur, alltaf slæmt að vita ekki hvað veldur og hryllilegt að horfa upp á barninu sínu líða illa, sérstaklega þegar maður getur ekkert gert.

Veðja á flensu eða umgangsmagapest frekar en inngangslasleika af því að við systurnar erum líka frekar slappar í maganum síðan við komum að norðan. Þó ekkert eins og þetta. Tek fram að systir mín er ekki einu sinni á GAPS, hvað þá á inngangi.

Ég verð að viðurkenna að svona sárlasið barn er extra óheppilegt þegar innan við tveir dagar eru í áætlaða brottför í sumarfrí sem mikið hefur verið lagt í að undirbúa. Mikið í húfi.

Matseðill minn (því hún borðaði ekkert nema smá kássu)

Svínalundar- og grænmetisrestar (í morgun) og kássa það sem eftir lifði dags. Í kássunni var svínahakk, engifer, hvítlaukur, paprika, gulrætur, brokkólí, blómkál. Smá sjávarsalt og nýmalaður pipar. Ég fékk mér 1 tsk af ghee út á kássu kvöldsins. En þetta er nú allt og sumt.

Bað dagsins: Epsomsaltsbað (bara fyrir mig)

Soð dagsins: Kindabeinasoð með smá grænmetissoði út í

Dagur 22

2010-06-29T23:10:00.005Z

Jæja. Ég er farin að verða dálítið stressuð vegna fyrirhugaðrar ferðar til útlanda. Við förum á föstudaginn. Ég verð basically ,,on the road" með börnin í 2 daga. Það getur orðið svolítið strembið, miðað við reynsluna frá því í ferðalaginu fyrir norðan. Dálítið mikið mál að vera sífellt að elda og elda og elda og elda og pakka í nestisbox og svo framvegis. Sérstaklega þar sem börnin mín borða mikið þessa dagana (ég líka). Ég hugsa að ég reyni að hafa meira af fljótlegu meðferðis fyrir þá minni, hún getur borðað banana og kex og alls konar þannig. Svo er bara að herða upp hugann og taka einn dag í einu.

Í gær pantaði ég eitt og annað GAPS-tengt af netinu:

Biokult - læknirinn mælir með því
Þorskalifrarolía - ég myndi segja lýsi, nema lýsi ku hafa verið hitað í framleiðsluferlinu sem dregur víst verulega úr gæðum þess (endilega leiðréttið mig ef þið vitið betur)
Charlies soap - lífrænt þvottaefni sem vonandi ertir enga húð (að því gefnu að þvottaefni hafi hugsanlega eitthvað með húðvandamál dóttur minnar að gera

Í dag reyndi ég heiðarlega að panta fyrir sjálfa mig snyrtivörur. Já, hljómar hégómlega og allt það og er það vel hugsanlega. En ég vil gjarnan geta verið fín án þess að vera að kafna og drepast úr mígreni og alls konar í leiðinni. Hins vegar tókst mér ekki að panta neitt af því sem ég var að reyna að panta. Bad karma?

Á laugardag, held ég, fór ég að finna fyrir sviða í vörunum. Fann hann fyrst þegar ég fékk mér lárperuna þarna í síðustu viku. Var að nota varasalva á bágtið. Þessi varasalvi er ein af fáum tilbúnum snyrtivörum sem ég hef verið að nota og þó hann eigi að heita ,,náttúrulegur" þá er hann bara einfaldlega ekki lífrænn. Um helgina fór mér að finnast hann eitthvað spúkí, hann gerir varirnar svo óeðlilega feitar svo lengi. Þannig að ég ákvað að hætta að nota hann. Það hefur verið bara talsvert flókið. Ég hef notað kókosolíu sem gerir ástandið síst betra og svo núna exem kremið frá Margréti Sigurðardóttur grasalækni (þetta sem við fengum í gær) sem slær smá á. Svona sviði er mjög týpísk ofnæmisviðbrögð fyrir mig. Mig svíður í varirnar, klæjar, stundum bólgna ég upp og stundum fæ ég útbrot yfir allt andlitið, niður á háls og út um allt bara. Návígi við myglusveppi hefur stundum komið þessu af stað, en ég held að þetta séu bara almenn ofnæmisviðbrögð líkamans míns. Ég finn talsvert fyrir þessu í dag, finn að ég er tæp. Fyndið, því ég hef ekki fengið þetta frá því að ég byrjaði á GAPS. Það er eitthvað í gangi - allt að gerast...

Mér var verulega illt í maganum í morgun. Tengi það við möndlusmjörið, sem þarf þó ekki að vera rétt. Stuttlan virtist ekki kenna sér meins. Og þó... hún fór í Bláa lónið í dag og klæjaði samt eftir á. Ekki neitt rosalega, en þó þannig að hún bað um burstann (sem hún klórar sér með, til að klóra ekki til blóðs). Kannski er það merki um að möndlusmjörið þolist ekki vel? Prófum aftur á morgun.

Ég prófaði líka ghee einu sinni enn í morgun og varð svo til strax illt. Það getur verið að maginn hafi bara verið almennt illa stemmdur. Þarf ekki að vera neitt alvarlegt.

Jæja. Það er heilmargt sem þarf að gera þessa dagana, ég ætti ekki að hanga og blogga eins og ég hafi ekkert betra að gera. Tíminn líður svo hratt, bara 2 og hálfur dagur eftir í brottför. Mamma mia.

Eitt enn; hitti konu í kvöld sem er að byrja á GAPS, með son sinn. Sonur hennar er búinn að vera á glúten- og kaseinlausu fæði í hálft ár eða svo og er nýbyrjaður á GAPS. Fyndið hvernig fólk hefur samband við mig núna. Ég hefði gefið handlegg fyrir að geta sett mig í samband við einhvern með reynslu þegar ég var að byrja. Gallinn er bara að mér finnst ég enn ekki vita nóg til að geta beint leiðbeint neinum. Ég get bara talað um mína eigin reynslu. Jú og bloggað eins og enginn sé morgundagurinn.

Matseðillinn

Morgunmatur barnsins: Kaldir kjúklingaleggir frá því í gær

Morgunmatur minn: Laxa- og grænmetisrest.

Hádegismatur: Ofnsoðið hrossakjöt með soðnu grænmeti

Síðdegishressing (barnsins): Restin af ofnsoðna hrossakjötinu og soðin paprika

Kvöldmatur: Ofnsoðin svínalund og ofnsoðið grænmeti (gulrætur, gul paprika, brokkólí, blómkál)

Hún fékk svo kókosolíuteskeið í dag.

Öfugt við það sem gerðist í fyrsta sinn sem ég fór á Innganginn finnst mér ég stöðugt vera svöng núna. Í fyrra hafði ég enga lyst, núna bara borða ég og borða og borða. Held að hvor okkar um sig fari hátt í kíló af kjöti hvern dag. Það er náttúrlega doldið mikið... og doldið dýrt...

Kjötsoð dagsins: Kindabeinasoð (ég var úti á þekju um daginn þegar ég sagðist ekki viss hvort soðið væri nauta- eða kindabeina, fnykurinn af kindabeinasoðinu þekkist mílur vegar og það voru sko pottþétt ekki kindabein um daginn, í hvorugt skiptið sem ég var ekki viss).

Bað dagsins: Bláa lónið og Epsomsaltsbað fyrir barnið

VIÐBÓT:

Þegar ég var búin að skrifa færsluna hér að ofan var klukkan að verða hálftólf og ég þurfti að ganga frá örfáum hlutum og ætlaði svo að renna mér ofan í ylvolgt Epsomsaltsbaðið - hið fyrsta fyrir mig í 3 daga. Var búin að hlakka til þess daglangt. En þá bærði eldri dóttir mín á sér, kveinaði að sér væri svo illt í maganum og í stuttu máli er hún búin að kveina í alla nótt. Ég setti hana á endanum í baðið í gær, hún sagði það slá á magaverkinn í smástund, en svo hætti það að virka og hún gubbaði. Vildi þá koma upp úr, kom inn til mín, ,,svaf" í mínu rúmi og gubbaði aftur um klukkustund síðar. Er svo bara búin að kveina og dotta inn á milli - ég hef ekkert getað gert nema bara strjúka magann eða nudda, halda utan um hana og vona hið besta. Gaf henni smá eplaedik út í vatn í gærkvöldi, svo smá engiferseyði eftir gubb nr. 2. Klukkan er orðin hálfsjö, ég setti hana fram á klósett en það kom ekkert. Gaf henni einn skammt af kjötsoði núna rétt í þessu. Hún gubbaði af fyrsta sopanum (gubb nr. 3) en kláraði svo. Núna er hún sofnuð, í smástund allavega, inni í rúmi. Vaknar eflaust eftir nokkrar mínútur til að kveina. Hún virkaði pínu heit áðan, en hún er ekki með neinn hita.

Maginn á mér er líka verulega órólegur, en ég er ekki með svona vítisverki eins og hún. Velti því fyrir mér hvað getur valdið. Velti því einnig fyrir mér hvað í ósköpunum ég á að gera varðandi barnið.

Dagur 21

2010-06-28T23:14:00.004Z

3 vikur???

Eruði ekki að grínast???

Vá... magnað...

Tíðindi dagsins eru helst þau að Bláa lónið virðist vera að sanna lækningamátt sinn. Skinnið litla fór í lónið í morgun og talar uppveðruð um þann mikla mun sem hún finnur. Ég sé mun, húðin er ljósari, jafnari og minna upphleypt. Hún klóraði sér ekkert fyrr en hún tók af sér úlnliðshlífarnar sem hún notar (ásamt með alls kyns öðrum hlífðarbúnaði) þegar hún spreytir sig á nýju hjólaskónum sínum. Þá klæjaði hana þar. Ég gaf henni nýtt krem á það frá grasalækni sem við höfum ekki prófað áður. Þess má geta að það var frænka hennar sem gaukaði að okkur kreminu, en sú frænka er á SCD sem segja má að segja fyrirrennari GAPS (sumir taka það fram yfir). Kremið virtist slá á kláðann.

Planið er að fara með hana daglega í lónið í nokkra daga. SCD-frænkan og önnur góð sem gift er inn í föðurfjölskylduna gáfu okkur frímiðana sína í lónið. Í vikulokin förum við út og þá verður náttúrlega ekki um það nein blá lón að ræða, mikilvægt að fá sem mest út úr því á meðan við getum.

Ég gaf henni teskeið af kókosolíu í dag, aftur. Það virtist ekki gera neitt slæmt síðast. Leyfi mér þá að reikna með að það eigi að vera í lagi. Í kvöld gaf ég henni líka teskeið af heitu möndlusmjöri. Það er e.k. test svo við getum byrjað að fikra okkur nær möndlusmjörs-lummunum sem eru sennilega það mest spennandi við stig 3, allavega fyrir krakkakríli. Já og mig... ég viðurkenni fúslega að ég er farin að þrá smá uppbrot. Það verður ekki leiðinlegt að geta bætt þessu við ef vel gengur. Ég hef reyndar ekki verið að þola neins konar bökunarvörur eða brauðmeti vel undanfarið. En það lagast kannski... ég prófaði allavega líka með henni, 1 litla teskeið. Himneskt. Þannig að þá erum við eiginlega hér með formlega byrjaðar á stigi 3. Sjáum svo til hvernig æxlast.

Magnað hvað maður lærir að meta mat á allt annan hátt...

Svo er það annað sem mér finnst mjög merkilegt og vil endilega tjá mig um.

Í síðustu viku kláraðist heimagerði og GAPS-væni armkrika ilmbætirinn minn. Ég datt niður á uppskriftina í haust skömmu eftir að ég byrjaði á GAPS og hef ekki notað annan síðan. Árin þar á undan var ég búin að vera með mjög stæka og þráláta svitalykt, svitna frekar mikið og semsagt mjög lyktsterkt. Svitalyktareyðar virkuðu sumir ágætlega í svona 2 - 4 vikur, en svo hættu þeir bara að virka. Undir það síðasta var ég að nota lífrænan frá Aubrey Organics. Það var semsagt hann sem ég fann þarna í síðustu viku þegar minn var búinn og ég þurfti nauðsynlega að fara út á meðal fólks. Þannig að ég smellti honum á mig og hélt að það myndi líða yfir mig vegna efnalyktarinnar. En ég komst af og... hef ekki þurft svitalyktareyði nema einu sinni síðan.

Athugið - þetta er mjög merkilegt. Kona sem þurfti áður oft að skipta um bol um miðjan dag vegna stækrar líkamslyktar getur nú verið dag eftir dag í sömu fötum (að því gefnu að þau óhreinkist ekki á annan hátt). Það gerðist einn daginn í ferðalaginu þegar ég sat lengi í hita í bílnum í kjól úr gerfiefni að það myndaðist svitalykt. Þess utan... alveg frí við allan þef. Ég lét meira að segja vesalings systur mína hnusa af mér og fötunum mínum þar sem ég átti bágt með að trúa eigin nefi...

Ég var ekki búin að átta mig á því hvílíkir fjötrar fylgdu svitavandamálinu, eða að það væri í raun vandamál yfir höfuð, en vá, hvað ég er að uppgötva nýjan heim núna. Hvað getur kona sagt?

Ég hef lesið fjölmargar reynslusögur fólks á GAPS-spjallinu sem hefur einn daginn vaknað upp við það sama - ilmuðu bara eins og blóm, án nokkurs eyðis. Þessar sögur snertu mig ekkert sérstaklega og ég get ekki sagt að þetta atriði hafi verið efst á óskalistanum mínum. En svo, þegar það gerist, þá er ég samt alveg orðlaus. Þetta er svo mikil sönnun á því að það sem er að gerast í kroppnum mínum er rétt. Alveg eins og góða andlega jafnvægið hjá dóttur minni, lauflétta öndunin og fullkomnu hægðirnar (okkar beggja). Þetta er ótrúlega kærkomin hvatning - við erum svo á réttri leið!

Matseðillinn

Morgunmatur: Ofnsoðnar svínalundir og pottsoðið grænmeti

Hádegismatur barnsins: Svínalundarest

Hádegismatur minn: 3 egg og rest af soðnu grænmeti (fór ekki mjög vel í maga)

Síðdegishressing barnsins: Kjúklingaleggir

Kvöldmatur: Ofnsoðinn lax og ofnsoðið grænmeti

Bað dagsins: Bláa Lónið (fyrir hana - ekkert fyrir mig)

Kjötsoð dagsins: Kjúklingabeinasoð

Dagur 20

2010-06-27T23:58:00.002Z

Við erum komnar heim en tölvan mín sem var í straujun nær ekki að tengjast netinu. Þannig að nú er ég í lánstölvu, bara til að geta bloggað smá um ferlið allt saman...

Stelpan var ívið skárri í húðinni í dag. Ljómandi góð líðan, öndun og hægðir. Engin kókosolía í dag.

Ég setti smá bláa lóns-leir á hana í kvöld, það virtist hjálpa smá... erfitt að segja samt.

Matseðillinn

Kássurest í morgun, kjúklingaleggir og soðið grænmeti á ferðinni og kjúklingalæri í kvöldmat heima.

Soð dagsins: Kjúllabein

Bað dagsins: Nada... ekkert bað í dag...

Dagur 19

2010-06-26T23:05:00.002Z

Það gleður mig að greina frá því að við borðuðum hvorki nautahakkskássu né kjúklingalæri í dag. Ónei, við borðuðum svínahakkskássu og kjúklingafillé... sem gerir sko gæfumuninn.

Fórum aftur í jarðböðin í dag. Aðalmálið með því að vera að þvælast þessa leið á ný var samt að ná í leir í ,,gamla" bláa lóninu þarna við Mývatn. Ég tiplaði út í með gallabuxurnar uppbrettar og skóf og skóf af botninum í 3 dalla. Planið er að prófa að smyrja þessu á barnið og sjá hvort einhver munur verður á.

En semsagt ágætur dagur. Framan af vorum við á Akureyri og ég eyddi ómældum tíma í að elda við þessar leiðinlega frumstæðu aðstæður. Að því sögðu vil ég taka fram að þessi íbúð er mjög kósí og aðstaðan að flestu leyti alveg rosalega góð, eiginlega bara mesti lúxus. Myglusveppirnir setja strik í reikninginn og svo er ég ekki með fjölbreytt tól til eldunar. Annars alveg frábært.

Stelpan hefur það svipað og í gær. Tók heiftugt kláðakast í nótt. Klæjar í dag. Flagnar smá en er samt bólgin. Ég gaf henni eina teskeið af kókosolíu í dag.

Tek það fram að maginn hennar virðist mjög góður, hægðir eru fínar, andleg líðan stöðug, öndun góð... allt í blóma nema húðin.

Matseðillinn

Morgunmatur: Ofnsoðin kjúklingafillé og soðnar paprikur (og 3 egg fyrir mig).

Hádegismatur: Svínahakkskássa

Kvöldmatur: Svínahakkskássa / kjúlli

Tek fram að litla barnið er að borða ýmislegt fleira.

Kjötsoðið gekk ekki vel í dag. Það var mjög misheppnað. Á endanum fengum við okkur bara lítið og ég ætla að henda rest...

Soð dagsins: Misheppnað nautabeinasoð

Bað dagsins: Jarðböðin við Mývatn

Ég sef allt of lítið. Þetta frí er sko langt frá því að vera hvíld.

Dagur 18

2010-06-25T22:43:00.003Z

Ég ætlaði að fara að lúra þarna í gær, eftir færsluna. Fór inn í svefnherbergi og dáðist að því hvað dætur mínar sváfu vært og voru undurblíðar og sætar svona hlið við hlið í hjónarúminu sem við deilum í ferðalaginu. Ákvað að smella af þeim mynd. Þegar ég var í þann mund að verða búin að stilla upp frá góðu sjónarhorni og ætlaði að fara að smella af bærði sú eldri á sér. Ég sá að hún var með eymdarsvip sem hefði alveg eyðilegt myndina, sem er náttúrlega svekkelsi út af fyrir sig, en áður en ég var búin að átta mig á því stundi hún orðin sem mæður vonast allajafna til að þurfa ekki að heyra: ,,Ég þarf að æla".

Ég fleygði frá mér myndavélinni (fann hana ekki aftur fyrr en í morgun, hún velktist undir okkur um rúmið í nótt), þreif barnið, kippti henni upp úr svefnpokanum og rauk með hana fram á baðherbergi. Náði ekki að klósettinu áður en fyrsta gusan kom og til að gera langt mál stutt þá hef ég aldrei - fyrr eða síðar, lent í meira sprengi-gubbi. Það var úti um allt - veggir, gólf, lausamunir, fötin okkar - allt útatað. Klukkan var orðin eitt þegar ég var búin að þrífa. Fórnaði baðhandklæðinu mínu. Barnið fór svo bara að sofa strax að gubbi loknu og hefur ekki kennt sér frekara meins síðan.

Skelli skuldinni á Inngangsferlið.

Vaknaði kl. 7.30 - litla stýrið vaknaði fyrst.

Í stuttu máli var þessi dagur góður og vondur.

Gott: Veðrið var glimrandi - allt gekk sæmilega eftir áætlun - átti góðar stundir með dætrum, systur og systurdóttur og einnig með 6 frænkum sem hér búa (við erum alls 4 systradætur með 2 dætur hver...)

Vont: Ég var svo þreytt og þokuð og gat með engu móti hugsað skýrt. Gekk illa að matbúa fyrir daginn, klikkaði aðeins á sjálfri mér og endaði því söng og pínu svekkt. Svimaði talsvert.

Matseðillinn

Bara kássa og kjúklingalæri til skiptis - sama og í gær. Nema í kvöld, þá fengum við okkur Ofnsoðið Ungnautainnanlæri með soðnu blómkáli (bara ég) og gulum paprikum (við báðar). Kærkomin tilbreyting.

Ég fékk mér líka 3 egg í morgunmat.

Melting okkar beggja er til sóma.

Kjötsoð dagsins: Nautabeina

Bað dagsins: Jarðböðin við Mývatn

Vil bæta því við að jarðböðin virtust ekki skila neinum árangri fyrir húð dóttur minnar. Ansi dýr að auki (það er Bláa Lónið líka, en við fengum ,,2 fyrir 1").

Ég vil líka bæta því við að þessi íbúð er frekar sveppuð - aðallega baðherbergið. Ég fann áhrifin mjög glögglega þegar ég vaknaði í morgun. Hef verið sem mest utandyra í dag. Sit t.d. úti núna. Vona að þetta sleppi til.

Dagur 17

2010-06-24T23:50:00.002Z

BRJÁLÆÐISLEGA SYFJUÐ...

Þetta hlýtur að verða stutt færsla, ef ég á annað borð er fær um að gera stuttar færslur.

Fyrri hluti dagsins fór í undirbúning af miklum móði. Það vildi mér til happs að afa barnanna hugkvæmdist að líta við og hefja skemmtidagskrá sem náði víst hámarki í Toys R Us. Báðar dætur mínar komu heim með ný sumarleikföng.

Við lögðum í hann um tvöleytið. Auk okkar þriggja eru í ferðinni systir mín og tæplega 10 ára dóttir hennar. Þær eiga jeppa.

Fyrra langa stoppið okkar var við Hreðavatn, hvar við áttum ljúfa stund í um einn og hálfan tíma. Nesti og ærsl.

Síðara langa stoppið var undir kvöld í sundlaug sem ég uppgötvaði af tilviljun í fyrrasumar. Í henni er semsagt sjaldan klór. Í dag var okkur sagt að síðast hefði farið í hana klór fyrir 4 dögum. Við létum því vaða og fórum í sund. Fann engin merki um klór á neinn hátt, en var samt á nálum. Hvað ef einhverjar leyfar eru samt eftir og nóg til að hafa slæm áhrif...

Stóra stýrið mitt flagnaði og flagnaði eftir sundið. Hún var farin að klóra sér á ný áður en við fórum í laugina, þannig að sundferðinni er ekki um að kenna þó að áhrif Bláa Lónsins séu farin að dvína. Sem aftur minnir mig á; ég sá greinilegan mun á húðinni hennar í morgun. Hún var betri. Jarðböð við Mývatn á morgun.

Ég gaf henni ekkert nýtt að snæða í dag.

Sjálf fékk ég mér 1 tsk af sauerkrauti.

Matseðill dagsins

Morgunmatur: Ofnsoðin kjúklingalæri og soðið grænmeti

Hádegismatur: Nautahakkskássa (engar kryddjurtir að þessu sinni) - maukuð fyrir börnin og ómaukuð fyrir mig

Síðdegishressing (við Hreðavatn): Köld kjúklingalæri

Kvöldverður (við þjóðveginn): Kássa

Kvöldhressing (á Akureyri): Kjúklingalæri

Svona er þetta semsagt.

Kjötsoð dagsins: Nautabeinasoð

Bað dagsins: Eiginlega ekkert... nema bara þarna sundið náttúrlega... nokkuð laust við allt, held ég (nema íslenskt hveravatn og tilheyrandi steinefni)

Dagur 16

2010-06-23T21:41:00.004Z

Það var svolítið þungt í mér hljóðið í gær. Það var það eiginlega að miklu leyti í dag líka. En ég ætla að byrja á smá extra jákvæðum punkti sem mér finnst mikilvægt að komi fram:

Dóttir mín er orðin alger hetja þegar kemur að innbyrðingu kjötsoðs. Í fyrra þegar við byrjuðum á þessu stússi bauð henni svo við því eftir nokkra daga að það lenti fljótlega mjög aftarlega í forgangsröðinni. Svo um áramótin var ég búin að lesa svo mikið um það hve mikið grundvallaratriði kjöt- eða beinasoð væri fyrir bata að ég ákvað að hún fengi bara agnarpínupons daglega. Innblásin af ströngum mæðrum á spjallinu hellti ég 6 matskeiðum af soðinu ægilega í bolla og píndi barnið til að drekka - á hverjum morgni. Ég tók líka strax þá ákvörðun að hjálpa henni ekki, eins og hún bað þó stíft um. Þetta eru 6 matskeiðar og hún á að geta innbyrt þær hjálparlaust. Þetta hefur kostað grát, einvistir, gnístran tanna, væl, nöldur, suð, kvart, kvein, endalausan eftirrekstur af minni hálfu og eeeeendalausar tafir á þessum dýrmæta morguntíma. Í stuttu máli: Barnið vill ekki soð. Ég hef ekki orðið vör við aukinn vilja eftir því sem tíminn hefur liðið (og hún ætti að vera farin að venjast).

En nú, á 16. degi inngangsins er hún farin að skvetta bolla eftir bolla í sig, án þess að ég þurfi svo mikið sem að segja eitt múkk. Ég rétti henni bara bollann og hún klárar í nokkrum teygum. Eins og draumur! Ég er alveg orðlaus. Það er rétt að taka fram að bollinn sem um ræðir rúmar ekki nema á að giska 10 matskeiðar. Hann var tekinn í notkun sérstaklega fyrir þetta inngangsferli. Við fórum í Keramik fyrir alla og máluðum hvor sinn kjötsoðsbollan sérstaklega til að byggja upp jákvætt andrúmsloft fyrir þetta inngangsferli. Það stoðaði þó lítið fyrstu 10 dagana eða svo, þar sem ég þurfti að rexa og pexa og ýta á eftir alveg jafn mikið og venjulega - og jafnvel brjóta odd af oflæti mínu og hjálpa smá.

En semsagt, litla hetjan bítur á jaxlinn, ég sé hana kúgast smá af og til... en hún lætur sig hafa þetta, ekkert nema harkan 6.

Og að mér: Vinkonur mínar komu í gærkvöldi og við tættum í okkur fataskápinn minn. Ansi margt á leið í endurvinnslu, sumt komið í endurvinnslu, auk þess sem ég hef af höfðingskap mínum tekið að mér að endurvinna nokkrar vel valdar flíkur úr þeirra fataskápum (takk, stelpur ;-) ).

Allavega, þetta var rosa kósí, þar sem ég stríði við helti á sviði smekkleika (allavega þegar kemur að sjálfri mér) finnst mér rosa gaman að fá svona pallborðsumræður um fatasamsetningar. Og ég byrjaði daginn í dag með bros á vör og valdi mér nýjan (fyrir mér), dömulegan kjól til að vera fín í í dag.

En svo var sljóleiki minn bara í sögulegu hámarki og ég gat ekkert gert og gerði vitlaust það litla sem ég reyndi að gera og svo framvegis og svo framvegis. Ekkert gekk einhvern veginn og tíminn bara leið frá mér. Undir hádegið var ég gersamlega niðurbrotin og fannst allt svart.

En jæja, ég tók mig á, hringdi í góða vinkonu, náði mér í smá æðruleysi og kjark og skellti mér með dætur mínar á Brúðubílinn í Breiðholti. Þær eru mjög hrifnar af umræddu farartæki og skemmtu sér hið besta.

Seinni partinn fór ég svo með þá eldri og keypti á hana langþráða hjólaskó. Fannst hetjan alveg eiga skilin verðlaun. Þess má geta að afinn borgaði brúsann. Barnið ljómar af hamingju, þrátt fyrir ströng fyrirmæli móður og verslunarstarfsfólks um notkun hjálms og annars öryggisbúnaðar, allavega framan af.

Svo fór ég með hana í Bláa Lónið. Það fannst henni enn meira æði. Hún er í skýjunum. Hún vildi ekki maka á sig leðju, bar við ótta við sviða. Talar hins vegar af miklum sannfæringarkrafti um hve mikinn mun hún finni á húðinni. Eini munurinn sem ég sé er að hún klórar sér ekki - og það er reyndar allnokkur árangur. Þorði ekki að setja hana í sturtu eftir lónið, vildi ekki skola burt snefil af kísil. Hárið á henni er eins og heysáta...

Fann enga klórlykt en gleymdi að spyrja: Er klór í lóninu???

Matseðillinn

Morgunmatur: Kjúklingalæri og grænmeti (allt ofnsoðið)

Miðdegismatur: Nautahakkskássa

Kvöldmatur: Kjúklingalæri og grænmeti (ofn- og pottsoðið).

Einhæfni...? Ha? Hvað meiniði?

Ég gaf barninu enga olíu í dag. Gaf sjálfri mér líka frí frá gheei, sauerkrautsafa og eggjum. Prófa að hafa einn þannig dag. Engin almennileg rök svosem, nenni allavega ekki að fara út í þau. Geri þetta svona núna. Sé til á morgun, reikna eiginlega með að taka þetta allt inn aftur þá.

Kjötsoð dagsins: Held lambabein...

Bað dagsins: Bláa Lónið (barnið fór líka í Epsombað í morgun)

Á morgun förum við í ferðalag. Þvílík áskorun!!!

Dagur 15

2010-06-22T18:31:00.002Z

Ókey... þetta á að vera heiðarlegt blogg. Ekkert yfirdrifið hetjukjaftæði. Ég ákvað strax í upphafi að vera alveg hreinskilin. Af þeim sökum neyðist ég til að segja: Mig langar bara til að grenja núna.

Ég sit í yfirgefnu tölvuveri opinberrar byggingar og er búin að eyða um einni og hálfri klukkustund í stífa rannsóknarvinnu vegna útbrota dóttur minnar. Hef þegið ráð frá 5 GAPS-reynsluboltum og bíð svars frá hómópata í ofanálag. Ég hef svo sem eitt og annað í höndunum... en tilfinningin er samt svimandi og yfirþyrmandi - ég er svo ógeðslega ein, einangruð og á móti straumnum.

Þetta eru þær pælingar og ráðleggingar sem ég er að gefa hvað mestan gaum:

Getur þvottaduftið verið að hafa áhrif? Þvottahnetur fást ekki á landinu núna, en ég panta ef ég næ því áður en tölvutíminn minn rennur út. Fæ þær samt ekki fyrr en ég kem til baka frá Noregi, eftir rúman mánuð. Upp úr hverju eigum við að þvo fötin okkar þangað til?
Getur þvottaefnið í uppþvottavélinni verið að hafa áhrif? Það er ekki svo langt síðan ég skipti um - kannski er það of sterkt fyrir hana, þó það sé voða umhverfisvænt og fínt (Ecover).
Omega-olíur. Ég gaf henni 2 msk af 3-6-9 (Udo's) í dag. Kannski er ég að auka skammtinn of hratt?
Bentonite-leir... veit ekki alveg hvað ég á að halda. Hann fæst ekki hér... veit ekki hvort hann virkar á akkúrat þetta þó að á það hafi verið bent. Hér er hlekkur.
Askan úr Eyjafjallajökli. Gróflega passar tímasetning versnunar útbrotanna við aukið öskufok inn á höfuðborgarsvæðið... getur það haft eitthvað að segja???
Hvítlaukur / hvítlauksolía. Ku vera gott á útbrot... virkar samt svo brútal eitthvað, mig svíður við tilhugsunina. Prófa það samt, helst eigi síðar en í kvöld. Hvað sem kann að virka.
Bláa lónið. Er að spá í að skella mér með hana á morgun. Varla versnar það? Veit einhver hvort það er klór eða einhver viðlíka óþverri í lóninu???

Annars var þetta svona bara frekar litlaus dagur. Ég er tölvulaus. Það er svosem í lagi, en ég er frekar slöpp og verður lítið úr verki, þrátt fyrir að vera sífellt að.

Það var samt ekkert myndefnisgláp í dag og við mæðgur áttum nokkrar ljúfar stundir saman, þrátt fyrir að stuttur væri í mér þráðurinn.

Ég var svo klikkuð að fá mér avocado síðdegis. Fannst ég bara verða að fara yfir á stig 3. En nú logsvíður mig í varirnar, sem er bara svona týpískt viðbragð fyrir mig. Semsagt ekki fleiri lárperur strax.

Matseðill dagsins

Morgunmatur minn: 1 egg

Morgunmatur hennar: 2 kjúklingalæri

Hádegismatur okkar beggja: Ofnsoðin kjúklingalæri og ofnsoðið grænmeti (paprika, kínakál, kúrbítur). Ég fékk mér líka annað egg með.

Síðdegisverður: Nautahakkskássa (nautahakk, blómkál, engifer, hvítlaukur, rauð paprika og basilíka).

Fengum okkur líka engiferte.

Kjötsoð dagsins: Nautabeinasoð

Bað dagsins: Epsomsaltsbað

Í kvöld koma vinkonur mínar í heimsókn. Við ætlum eitthvað að skvísast og hafa gaman. Ég læt mig hlakka til og stefni að því að hætta að hugsa um útbrot rétt á meðan.

Dagur 14

2010-06-21T22:43:00.004Z

Ég er tölvulaus!

Ég sem ætlaði að hafa þetta daglegt blogg.

Ég er semsagt í lánstölvu núna. Veit ekki hvernig ég leysi þetta á morgun... og hinn... eða svo lengi sem þetta ástand kann að vara. En allavega; ég skaust yfir til foreldra minna og fæ að komast í tölvu hér svo ekki falli dagur úr vefdagbókinni.

Í morgun var ég búin að fá 5 svör við fyrirspurn minni um útbrot dóttur minnar. Þar sem ég hef ekki getað legið yfir tölvunni (sem er í viðgerð), þá hef ég ekki náð að stúdera þessi svör nóg, en þau voru samt ágæt. Tvennt sem stendur upp úr, svona við fyrstu umhugsun:
a) Athuga með þvottaefnið (þvottahneturnar mínar kláruðust nýlega og hafa ekki fengist á landinu undanfarið og því hef ég notað „venjulegt“ - lífrænt).
b) Gefa henni eins mikið af olíum og í hana verður látið.

Þannig að ég þvoði þvott í dag með síðustu löngu uppþornuðu og skrælnuðu þvottahnetunum - og smá tea tree olíu.

Barnið fékk skeið af Omega 3-6-9 og sér henni enginn bregða.

Aðeins um mig: Ég er með smá flensueinkenni. Ég er ekki frá því að þau orsakist bara af flensu, þar eð ýmsir hafa verið að leggjast í flensu í kringum mig. Það væri samt fúlt. Nóg er nú samt.

Og þar sem ég er svona sljó og slöpp og virkilega þokuð í kollinum hef ég líka verið dálítið skapstygg, sérstaklega í samskiptum við dóttur mína. Hún á það alls ekkert skilið. Ég reyni að stilla mig - og biðja hana afsökunar jafnóðum þegar mér verður á.

Svo hef ég fengið smá bólur. Ekki nein útbrot, en kannski svona 4 eða 5, venjulegar bólur bara. En þaðer mikið fyrir mig, ég fæ yfirleitt ekki bólur. Þannig að kannski er einhver úthreinsun í gangi, eða eitthvað.

Velti því einnig fyrir mér hvað sé í gangi með neglurnar á mér. Ég naga yfirleitt ekki, en þó alltaf þegar ég geng í gegnum stresstímabil. En núna er ekkert mikið stress í gangi beint og ég er með 9 neglur upp í kviku. Skrítið. Kannski hefur líkaminn einhverja bilaða þörf fyrir naglakalk... eða eitthvað.

Eitt enn um ástandið á mér: Ég var með mjög illt í maganum framan af degi og svo eftir kássuna í kvöld fékk ég aftur hressilega í magann. Framan af deginum lá ghee-ið undir grun, en nú er ég farin að hallast að því að ég þoli ekki þessar kássur nógu vel. Tók líka eftir þessu í gær, hélt að það væri bara eitthvað tilfallandi. En kannski ef ég mauka þær ekki...?

Matseðill dagsins

Morgunmatur heimasætunnar: 2 kjúklingalæri
Morgunmatur minn: Skál af kássu gærdagsins

Miðdegisverður okkar beggja: Ljómandi ofnsoðnar kálfainnanlærissneiðar (eða eitthvað beljukyns allavega) og hressileg ofnsoðin grænmetisblanda með.

Kvöldmatur: Maukuð nautahakkskássa með brokkóli, papriku, hvítlauk og basilíku.

Kjötsoð dagsins: Nautabeinasoð

Bað dagsins: Epsomsaltssbað

Og ég segi með stolti frá því að þar sem dóttir mín er sprellhress þá var sko ekkert dvd-gláp á mínu heimili í dag - ekki ein mínúta. Bara eldhresst prógramm, daginn langt. Hún teiknaði og litaði fallega mynd og hún fór út að leika sér og svo kom vinkona í heimsókn og þær léku sér af krafti og svo fórum við í smá bíltúr + stúss og svo þegar heim var komið fór hún aftur út að leika, þar til ég kallaði á hana inn í kvöldmat. Hún minntist ekki einu orði á myndefnisáhorf af neinu tagi og ekki datt mér í hug að nefna það. Svona á þetta náttúrlega að vera.

Dagur 13

2010-06-20T22:55:00.002Z

Ég vaknaði í morgun að drepast úr „sveppaveiki“. Fyrir ykkur sem ekki vitið það, þá gera myglusveppir í húsnæði fólk veikt. Þegar maður hefur einu sinni orðið alvarlega veik/-ur út af slíku er maður viðkvæmur fyrir. Þetta er eitthvað misjafnt eftir fólki náttúrlega, en í stuttu máli mynda myglusveppir gró og í gróunum eru eiturefni (míkótoxín) sem brjóta niður ónæmiskerfið. Meira um það allt hér.

Eftir að ég byrjaði á GAPS er ég miklu sterkari fyrir en áður og hef þolað návígi við myglusvepp í húsnæði miklu betur. Ég hef gist þar sem ég gisti í nótt nærri aðra hverja helgi frá því í janúar og ekki orðið alvarlega meint af. Ég hef reyndar fundið það á degi 2 að ég hef ekki mjög gott af mjög miklu svona, en einkennin hafa ekki verið alvarleg. Ég veit ekki hvað veldur núna. Ég var meira að segja líka með kattaofnæmiseinkenni (það eru yndislegar kisur þarna), sem ég fæ sama og aldrei... mörg ár síðan síðast. Kannski var þetta af því að ég var þarna í fyrsta sinn í 2 nætur í röð, eða kannski er ég viðkvæmari af því að ég er í þessu blessaða inngangsferli. Allavega, ég sá þann kost vænstan að koma mér út. Hitaði kjötsoð, fór út í göngutúr, fór svo inn og pakkaði öllu og rölti til systur minnar sem á heima rétt hjá.

Ég var eins og slytti þegar ég kom til hennar. Og þess má geta að það eru líka myglusveppir heima hjá henni. En við fórum saman í góðan göngutúr (vörðumst árásum kría með regnhlíf) og fátt bætir sveppaveiki jafn mikið og hressilegur göngutúr í fersku lofti. Þannig að mér leið til muna betur.

Svo fór ég aðeins að stússast - sem er ekki góð hugmynd á sunnudegi því allt er víst lokað. Ég verð alltaf jafn hissa... ;-)

En ég var hjá systur minni þar til nokkuð var liðið á seinni partinn og var svona semi-hress, miðað við allt og allt. Sofnaði aðeins á sófanum hennar, en samt... sveppaeinkennin í mikilli rénun.

Þannig að ég fór ekkert að daðra við stig 3 í dag. Það hefði verið út í hött. Kannski á morgun, þar sem ég er komin heim í mitt eigið tiltölulega myglufría umhverfi (slatti af ryki samt).

Eitt enn samt; ég gerði netta eiturefnaárás á sjálfa mig í nafni hégómans í kvöld. Ég litaði augnahár og -brúnir með svona „do it yourself“-lit. Heppnaðist ekkert stórkostlega, en dugar þar til ég splæsi í alvöru lit. Allavega, þessi augnaháralitunarefni eru brjálað eitur. Mig svíður alltaf í augun allan daginn ef ég geri þetta fyrri part dags. Vona að þetta setji ekki allt úr skorðum eins og myglan.

Um barnið: Hún hafði hægðir á ný í dag. Ég var ekki viðstödd, en mér er sagt að þær hafi ekki verið fagurlega formaðar, meira í ætt við niðurgang. Sem er mjög dæmigert fyrir hana, en hún er þó allavega með einhverja virkni. Hún krafðist þess að faðir hennar tæki myndir - til að sýna mér... en hann var semsagt ekki til í það...

Útbrotin hennar eru frekar slæm, finnst mér, miðað við allt og allt. Ég er að „prufa“ á henni nýtt krem, þ.e.a.s. krem sem ég hef ekki áður borið á hana. Sé engan mun enn, en bíð spennt. Nú hefur hún fengið kássu yfir helgina (= stig 2), en mér finnst hún ekki nógu góð í húðinni. Skil varla að þessi kássa sé það krassandi að hún sé eitthvað að hafa áhrif. Og ekki getur barnið lifað á kjúklingaleggjum í allt sumar. Setti inn mjög örvæntingarfullt neyðarkall á spjallið - einhver hjálpi mér með þetta útbrotamál!!!

Matseðill dagsins fyrir mig:

3 linsoðin egg í morgunmat
2 tsk sauerkrautsafi
1 tsk ghee
Kássa (lambahakk, paprika, hvítlaukur, blómkál, gulrætur, kóríander, pipar, Himalaya salt)
Kjúklingalæri í kvöldmat með soðnu grænmeti

Kjötsoð dagsins: Ómerktur beinapoki, held að það hafi verið lambabein

Bað dagsins: Matarsótabað

Lexía dagsins: Það má ekki hita steinselju (t.d. nota í kássu)! Hún mun við það leysa frá sér eiturefni. Eða þetta sagði systir mín mér, ég á eftir að gúggla þessa visku, bara ekki núna, verð að fara í heita matarsótabaðið mitt og svo að lúra. Góða nótt.

Dagur 12

2010-06-20T00:09:00.003Z

Við mæðgur vorum ekki saman í dag, þó að ég hafi reyndar aðeins hitt hana. 2 stigs matseld fyrir hana var því í höndum föður hennar (ég gerði reyndar kássuna í gær).

Maturinn minn í dag

2 teskeiðar af súrkálssafa (= helmingsaukning)
3 linsoðin egg (= aukning um eitt)
Kássa (svínakjöt, blómkál, brokkkál)

Kjötsoð dagsins: Kjúklingabeinasoð

Bað dagsins: Ekkert fyrir mig... en uppáskrifað Epsom fyrir barnið

Fátt um þennan dag að segja. Nema jú, GAPS-bloggari í USA linkaði á bloggið mitt á sínu. Jei! Hennar blogg er linkað hér til hægri (Food experiment).

Ég er að díla við smá myglusveppaviðkvæmni, í húsnæðinu sem ég er í yfir helgina. Finn að ég er viðkvæmari fyrir því áreiti núna en ég hef verið undanfarið. Verð að fara varlega.

Ákvað að reyna við stig 3 á morgun, þ.e.a.s. ef allt gengur að óskum ætla ég að prófa eitthvað af því sem í boði er á því stigi áður en morgundagurinn er allur. Samt smá spurning með það út af myglusveppaástandinu. Sé til, met stöðuna á morgun. Ég þrái eitthvað ferskt... það er í boði avókadó á stigi 3.

Get ekki beðið eftir stigi 4, þá kemur gulrótarsafinn inn... Mmhh... bara verst að það er erfitt að fá almennilegar lífrænar og óklórþvegnar gulrætur núna :-(

Dagur 11

2010-06-18T23:46:00.002Z

Um þrjúleytið í dag barst mér langþráð heróp innan af baðherbergi: ,,MAMMA, ÉG KÚKAÐI!!!"

11 dagar, 4 stólpípur og svo loksins... tókst henni þetta sjálfri ;-)

Ljómandi hægðir meira að segja. Algerlega klippt og skorið nr. 4 samkvæmt Bristol stool chart.

Vel hugsanlegt að aðrar mæður séu að spá í einhverju öðru... en þetta er mjög, mjög mikilvægt fyrir okkur.

Annars hefur barnið verið svolítið upp og niður á stigi 1 og 2. Var eiginlega á stigi 2 í gær, en hafði svo sjálf áhyggjur af því að sig klæjaði og kenndi kássunni um. Ég var svosem efins, en leyfði henni að ráða, enda ekki svo nöjið. Hún var því á stigi 1 í dag en það glaðnaði heldur yfir henni við hægðirnar og hún fór að tala um stig 2 með mun meiri bjartsýni. Hún fær að fikra sig þangað á morgun, en það er reyndar ekkert nema kássur af því stigi sem er aktúelt að reyna.

Ástandið á henni er annars skrítið. Hún var ekki sofnuð þegar ég skrifaði í gær. Þá hafði ég ekki heyrt múkk frá því um 11 en hún lá bara kyrr og beið þess sem verða vildi (sem var semsagt ekki svefn). Þannig að þegar ég uppgötvaði þetta, upp úr miðnætti, dreif ég hana fram, lét hana pissa, drekka smá vatn og horfa á vídeó á meðan ég fór í bað. Aðeins að brjóta upp bylturnar í rúminu. Svo fór hún aftur inn í rúm um kortér í eitt. Ég fór sjálf að sofa, en hún segist hafa sofnað fljótt eftir þetta.

Nú er ég ekki heima, en síðast þegar ég vissi, um kl. 11, var hún enn vakandi. Samt svaf hún bara til rúmlega 9.00 í morgun og sagðist ekkert svo þreytt í dag. En svo var ég að fatta að hún hefur lítið leikið sér úti við undanfarið, þó að orkan sé að mestu komin til baka. Þannig að það gæti spilað inn í.

Loks eru útbrotin aðeins á bataleið, allavega frekar en hitt. Þau eru enn rauð og hana klæjar, en þetta flagnar mikið núna, sem er góðs viti og hefur hingað til þýtt að það sé að jafna sig. Ég verð samt að viðurkenna að mér stendur ekki á sama varðandi þessi útbrot. Þau eru eiginlega svona snúnasti aðkallandi heilsuvandinn núna, því þau valda henni miklum, óvéfengjanlegum óþægindum og það er ekki til nein GAPS-væn skyndilausn.

Þannig að... hægðir komnar í gang, svefnvenjur úr skorðum en útbrot horfa sennilega til betri vegar. Það er status barnsins.

Hvað mig varðar... æji, svaf ekki nóg og var á fullu í allan dag. Allt gekk vel, en ég var svolítið stressuð og gleymdi að borða stóran hluta dagsins, sem er alls ekki gott. Ég passaði ekki nógu vel upp á mig í dag, fylgdist ekki með eigin líðan. Og nú er ég aftur svöng en nenni ekki að malla neitt. Klukkan er orðin margt.

Ég fékk mér samt 1 tsk af gheei og er nokkuð viss um að engin einkenni hafa komið fram í tengslum við það.

Pínulitla stýrið fékk ekki ghee í gær, en hins vegar í dag, í 3ja sinn. Henni virðist (7, 9, 13) heldur ekki verða meint af.

Matseðill dagsins...

Morgunmatur minn: 2 egg
Morgunmatur barnsins: Kjúklingalæri + 3 kjúklingaleggir

Matur, nasl og snarl yfir daginn: Kjúlli, soðið grænmeti, lambahakkskássa (bara fyrir mig reyndar)

Kvöldverður: Ofnsoðnir blálönguhnakkar með sjávarsalti, nýmöluðum pipar og fersku dilli, bornir fram með soðnu brokkólí og soðinni gulri papriku.

Kjötsoð dagsins: Kjúklingabeinasoð

Bað dagsins: Epsom

Dagur 10

2010-06-17T23:34:00.003Z

Matseðill dagsins

Morgunmatur minn: 2 linsoðin egg og smá soðin paprika frá því í gær
Morgunmatur eldri dóttur minnar: 1 kjúklingaleggur

Hádegismatur: Lambahakkskássa með blómkáli, papriku, brúsk af steinselju, brúsk af kóríander og basilíkubrúsk + 2 hvítlauksrifjum (fyrir hádegismatinn borðaði stelpan reyndar 5 kjúllaleggi).

Síðdegisbiti barnsins: 2 kaldir kjúklingaleggir
Síðdegisbiti og kvöldmatur minn: Lambahakkskássan
Kvöldmatur barnsins: 4 volgir kjúklingaleggir

Kjötsoð dagsins: Nautabeinasoð + kjúklingasoð

Bað dagsins: Epsomsaltsbað

Klukkan er orðin allt of margt. Hef þetta bara mjög stutt núna. Helstu pælingar dagsins snerust um hugsanlega mengun eða eituráhrif í gegnum húð. Þetta kann að hljóma eins og argasta djók fyrir þá sem ekki eru svona viðkvæmir eins og við en tvennt fengum við á húðina í dag sem við erum ekki vanar og tvenns konar viðbrögð komu fram sem ég velti fyrir mér hvort tengist því sem á okkur var borið.

Barnið: Fékk andlitsmálun á þjóðhátíðarhöldunum. Ég ræddi við hana áður og bað stelpuna sem málaði að gera bara lítið, til öryggis, þar sem húðin er enn ekki orðin góð. Hún fékk því 2 lítil hjörtu á ennið og 2 litla, bláa tígla á kinnar (einn á hvora). Það var allt og sumt og hún var alveg sátt. Fljótlega fór hana hins vegar að klæja í það sem hafði verið málað. Ég hélt kannski að hún væri bara að ímynda sér, vegna þess hve mikil athygli beinist að húðinni og öðru sem tengist heilsunni þessa dagana. Hún hélt samt áfram og á endanum þreif faðir hennar hana með ólífuolíu (ég var ekki hjá henni þá).

Ég: Nota ekki mikinn farða eða snyrtivörur yfir höfuð. Leit þó í spegil áður en ég fór út í dag og sá ekki fagra sjón. Mjög föl og slappleg kona með dökka bauga. Greip í flýti þau fegrunarmeðöl sem hendi voru næst. Í stuttu máli var svokallað steinefnapúður í aðalhlutverki. Forsaga þess er að ég prófaði í vetur þannig hjá vinkonu og var mjög impóneruð. Leið mun betur í húðinni undan því en venjan er. Hins vegar er sú tiltekna tegund sem hún var með ekki til hér á landi og mér var bent á að sambærilegt púður fengist hér, í öðru merki. Keypti það. Það er hins vegar engan veginn eins. Ég skráði niður efnisinnihaldið en hef aldrei komist í að kanna það, enda þarf þess svosem ekki endilega. Nóg að vita að mikið er af ónáttúrulegum og algerlega ólífrænum efnum. Nema hvað, þetta notaði ég fjálglega þarna í dag, enda á ég ekki margt annað af þessum toga. Einnig smá augnblýant og lífrænan maskara (sem er reyndar drasl). Þegar líða tók á daginn fékk ég magaverki og varð óþægilega óglatt. Frekar ólíkt líðan undanfarinna daga og ekkert nýtt í mataræðinu, nema kannski kóríanderinn...?!

Allavega, ég velti því fyrir mér hvort þetta tengdist púðrinu. Kæmi mér ekki á óvart. Tilfinningin í húðinni er líka mjög óþægileg og þó er ég búin að þrífa eftir getu.

Vegna þessa sleppti ég gheeinu í dag. Það hefði verið erfitt að meta hvort það hefði áhrif.

Lagði hins vegar möndlur í bleyti, í þeirri von að geta gert möndlusmjör (prepp fyrir stig 3).

Já og skottið mitt hefur sofnað mjög seint í dag og í gær, eða um ellefuleytið. Samt vaknar hún eins og klukka á morgnanna og er orðin sæmilega orkumikil að deginum. Hana klæjaði mikið í kvöld, ekki bara í andlitsmálingarsvæðin.

Dagur 9

2010-06-16T22:53:00.002Z

Matseðill dagsins

Morgunverður minn: Kjötsoð með hrárri eggjarauðu og restin af nautahakkskássu gærdagsins
Morgunverður eldra barns: Köld kjúklingalæri og soðin rauð paprika
Morgunverður yngra barns: Nýbakað hnetubrauð með hunangi og banana

Hádegisverður móður og eldra barns: Heit kjúklingalæri og grænmeti (mamman fékk líka linsoðið egg)

Síðdegishressing: Kjúklingalæri við stofuhita...

Kvölmatur: Ofnsoðin rauðspretta með sjávarsalti, nýmöluðum svörtum pipar og ferskri basilíku (þ.e.a.s. hún var fersk áður en hún fór í ofninn...) fyrir alla nema eldri dótturina - hún fékk ekki basilíkuna. Soðnar paprikur og kúrbítur með.

Kjötsoð dagsins: Nautabeinasoð með slatta af kjúklingalærahlaupi

Bað dagsins: Hið sívinsæla Epsomsaltbað

Dóttir mín er óðum að braggast og mér virðist sem útbrotin séu líka aðeins að skána á ný. Ég hef haft svolitlar áhyggjur af einhæfninni - kjúklingalæri og kjúklingaleggir til skiptis... sem er þó skref fram á við frá því að það var bara skinn...

En ég er fegin að ég kom í hana fiski í kvöld. Rauðspretta er hennar uppáhald og ég bara skil ekki af hverju. Mér finnst hún með minna spennandi fiskmeti sem hægt er að hugsa sér. Þó er hægt að poppa hana upp, t.d. með hneturaspi og Neptúnusarkryddi - hvorugt er leyfilegt á stigi 1 / 2.

Og varðandi það: Sú stutta var alfarið á stigi 1 í dag og ég sleppti líka alveg sauerkrautsafanum. Ætla að reyna að sjá hvort útbrotin skána ekki á næstu dögum. Prófa svo safann og ef ekkert versnar þá reikna ég með að eggin séu sökudólgurinn. Það má þá prófa þau aftur eftir 2 - 3 vikur. Ferlegt vesen - en vona samt innilega að það séu eggin, þá vitum við hvað það er!

En ég reikna með að formlega verði hún á stigi 2 á morgun, þó að breytingarnar verði sennilega ekki aðrar en kássa.

Minnsta konan á heimilinu fékk aftur ghee í dag og er alsæl. Veit varla meira sport. Verð ekki vör við einkenni hjá henni enn. Sjálf prófa ég líka aftur á morgun - það liggur við að ég sé jafn spennt og barnið.

Dagur 8

2010-06-15T22:41:00.002Z

Á ég að trúa þessu? Dagur 8! Magnað hvað við erum duglegar!

Og á meðan ég man - takk fyrir athugasemdirnar. Upphaflega hugsaði ég með mér að alveg eins og ég skráði allt sem fram fór þegar við reyndum Innganginn í fyrrasumar í stílabók gæti ég skráð allt á netið og e.t.v. gætu aðrir GAPSarar haft gagn af því. En svo sé ég að allavega þeir sem voga sér að skrifa athugasemdir eru ekki endilega GAPSarar... sem er vissulega allt í góðu lagi. Þetta hlýtur samt að virka rosa klikkað í augum þeirra sem ekki þekkja hugmyndafræðina. Mæli með því að þið kíkið á tenglana sem ég setti inn hér til hægri og reynið að finna smá grundvallarupplýsingar til að varpa ljósi á allt þetta tilstand okkar.

Annars má vera að ég muni minnast þessa dags sem dagsins þegar mjólkurvara fór inn fyrir mínar varir án þess að valda neins konar ofnæmiseinkennum. Að því sögðu er talað um 4 daga... þannig að ég gæti fengið ný og hress ofnæmiseinkenni næstu 3 daga. Ég veit náttúrlega ekkert hvert ferlið er venjulega, en ég er vön að fá einkennin bara strax, þannig að hver veit...

Umrædd mjólkurvara er ghee - skírt smjör eða hrein mjólkurfita einfaldlega. Ef allt fer vel mun ég geta notað ghee í eitt og annað sem ég elda. Þó mun verða nokkur bið eða u.þ.b. hálft ár í að ég geti bætt við fleiri mjólkurvörum.

Ég tók bara eina teskeið af ghee-inu í dag (eins og ráðlagt er) og sé svo til ekki á morgun heldur hinn hvort ég treysti mér í aðra.

Yngri dóttir mín, sem ekki er á inngangsfæðinu (fullu GAPS-fæði), fékk líka að smakka ghee í dag og hefur enn ekki sýnt nein einkenni. Það eru bara nokkrir mánuðir síðan hún fékk síðast að prófa og fékk samstundis allsvaðalegt nefrennsli. Hennar helstu einkenni eru þau sömu og mín, mikið nefrennsli og magakveisa. Stóra systir bætir um betur með hressilegum útbrotum í ofanálag. En sú stóra fékk ekki neitt svona í dag, var í raun bara aftur á stigi 1, án eggja og kássu (saknaði ekki kássunnar...) og með lágmarksskammt af súrkálssafa.

Hún var sæmilega hress en frekar ergileg. Eyddi miklum hluta dagsins með nefið á kafi í bókinni sem hún var að leita að í gær (hún fannst í morgun). Mér skilst að börn á þessum aldri hafi almennt mest gaman af sögubókum. Dóttir mín er hins vegar ekki síður áhugasöm um hand- og fræðibækur ýmiss konar. Bókin sem hún gleypti í sig í dag er ,,handbók unga hundaeigandans“ (við eigum ekki hund) - skrifuð af hundasálfræðingi.

Ég var agnarpínulítið hressari en í gær (held ég). Samt enn frekar grunnt á pirringnum. Sem er slæmt því verkefni dagsins voru mjög pirringsvaldandi. Ég þurfti að þeytast á milli stofnanna og ná í pappíra. Sem er alltaf jafn svakalega gefandi og skemmtilegt. Dóttir mín var með mér í bílnum svo til daglangt, með bókina góðu. Af og til deildi hún með mér staðreyndum um sálarlíf hunda sem henni fannst forvitnilegar.

Síðdegis var pabbi barnanna við stjórnvölinn á meðan ég vann í verkefninu laaanga.

Matseðill dagsins var ruglingslegur og samanstóð aðallega af afgöngum frá því í gær, svínalundum, kjúklingaleggjum og grænmeti og svo keyptum við og hituðum ný kjúllalæri og þegar ég var ein seinni partinn gerði ég fyrir mig nautahakkskássu - í grófum dráttum svipaða og í gær (stelpan át kjúklingalæri á meðan).

Kjötsoð dagsins: Nautabeinasoð

Bað dagsins: Epsomsaltbað

Dagur 7

2010-06-14T22:53:00.004Z

Ég myndi þurfa að gera margar færslur á dag ef ég ætti að muna bara það helsta sem flýgur í gegnum hausinn á svona degi.

Litla skottið mitt (það yngra) smellti kossi á kinn mér og hljóp af stað að leika sér svo til um leið og ég kom með hana á leikskólann. Það er ekki dæmigerð morgunhegðun. Ég dró þá ályktun að helgin hefði ekki verið sérstaklega skemmtileg hjá henni...

En í dag var merkisdagur hjá okkur Inngangsmæðgum. Í dag fórum við yfir á stig 2. Fyrir þá sem ekki eiga biblíuna The GAPS Guide þá er þetta það sem má láta ofan í sig á stigi 1:

Soðið kjöt
Soðinn fiskur
Soðið grænmeti
Engiferte
Kjötsoð
Súpur (úr einhverju af ofantöldu)
Já og svo smá probiotics (t.d. súrkál eða duft)

Hafandi lifað á þessu í 6 daga kættumst við að vonum við að mega bæta við:

Hráum eggjarauðum
Linsoðnum eggjum
Kássum
Gerjaðri síld, sardínum eða öðrum fiski
Meira súrkáli (ss. stærri skammtur en á stigi 1)
Ghee-i (fallbeygist það, annars?)

En ekki er allt sem sýnist, það má ekki bæta þessu öllu við í einu. Ef við gerum það og fáum einkenni vitum við ekki hvað af því það er sem veldur einkennunum. Þannig að við völdum tvennt til að byrja með: Hráar eggjarauður og kássu auk þess sem ég gaf stelpunni aðeins meira súrkál líka, af því að hún elskar það.

Við vöknuðum frekar seint og eftir leikskólaskutl og morgunmat settist ég við vinnu. Dagskrá barnsins var (í þessari röð):

Leiðin til Gayu (vídeó)
1 og ½ Latabæjarþáttur (DVD)
Kjúklingaleggjamáltíð
Út að leika
Svínalundamáltíð
Bíltúr með mér að ná í litlu systur og útrétta hist og her
Heim að upplifa vonbrigði yfir að HM hefði étið barnatímann
Kássumáltíð
Stólpípa
Bað
Beint upp í rúm

Hún var í rjómaskapi í allan dag, alveg þar til litla systir var komin í bílinn. Litla barninu til varnar skal tekið fram að það hegðaði sér einkar vel í alla staði, en um leið og sú stóra leit það augum var góða skapið fokið út í veður og vind.

Sjálf hef ég verið með allstuttan þráð í dag og í gær. Ég þoli líka hljóðáreiti illa. Þokan í heilabúinu, liðverkir, orkuleysi og syfja eiga eflaust sinn þátt í því. Plús það að þetta síðasta verkefni sem ég er að ljúka í vinnunni minni ætlar ALDREI að verða búið. Alltaf þegar ég held að ég sjái fyrir endann... þá bætast við flækjur. Ég er komin tveimur vikum á eftir áætlun og þar með tveimur vikum á eftir með ansi margt í mínu lífi!!!

Svo fékk ég einhverjar hjartsláttartruflanir í kvöld. Það hljómar rosa dramatískt, veit svo sem ekki hvaða nafni ég á að kalla það. Líður líka eins og ég sé sólbrunnin í framan, sem er frekar spes því ég hef ekki séð sól í marga daga.

Mér fannst kvöldverðarkássan fáránlega góð. Það sýnir e.t.v. hve lítið þarf til að gleðja þegar einhæfnin er farin að verða þrúgandi...

Eitt enn: Kláði og útbrot virtust aukast hjá stelpunni eftir því sem leið á daginn. Í lokin, þegar hún var að fara upp í rúm, var hún farin að klóra sér allt að því jafn mikið og fyrir viku. Veit ekki hvað veldur en eggjarauðan frá því í morgun liggur helst undir grun og ég set því egg í straff í bili.

Matseðill dagsins

Morgunmatur: Rest af kálfafillé + kjúklingaleggir og grænmeti frá því í gær
Hádegismatur: Ofnsoðnir kjúklingaleggir + ofnsoðið grænmeti
Síðdegisverður: Ofnsoðið svínafillé + ofnsoðinn kúrbítur
Kvöldmatur: Kássa! Innihald: Svínahakk, brokkólí, gul paprika, steinselja, hvítlaukur, salt + pipar – allt maukað og soðið í potti

Kjötsoð dagsins: Nautabeinasoð
Bað dagsins: Matarsótabað

Dagur 6

2010-06-13T22:42:00.003Z

Jei, ég er komið með fyrsta kommentið á þetta blogg (sjá síðustu færslu)! Takk, Hildur ;-)

Þessi dagur var fremur frábrugðinn hinum. Ekki bara af því að það er helgi.

Fyrir það fyrsta var dóttir mín merkjanlega hressari í dag. Engar hægðir samt. En aukinn hressleiki á víst að duga, skv. The GAPS Guide. Ef fram fer sem horfir er hún klár í 2. stig á morgun.

Í öðru lagi þá var þetta myndefnislaus dagur, fyrir utan Stundina okkar, sem er heilög fyrir eldra afkvæmi mínu.

Af þessu leiddi að ég var tilbúin með afþreyingarprógramm í morgun. Við föndruðum pennastatíf og svo vatnslituðum við allar þrjár í sameiningu e.k. gardínu í annan stóra stofugluggann (sem aldrei hefur verið keypt gardína í).

Svo sáðum við papriku- og kóríanderfræjum í potta. Foreldrar mínir komu líka í heimsókn. Nóg við að vera, semsagt.

Frá því um þrjú til sirka sex hafði faðir barnanna ofan af fyrir þeim á meðan ég lokaði mig af í þeim tilgangi að reyna að vinna og hvíla mig. Hefði getað gengið betur, en látum það vera.

Eldri dóttir mín var ögn líkari sjálfri sér í dag en dagana á undan, fór t.d. og náði í gítarinn sinn og glamraði nokkur lög og leitaði út um allt að tiltekinni bók sem hún hafði hugsað sér að lesa. Hún var samt fremur illa stemmd andlega og lynti til að mynda mjög illa við systur sína allt frá því að hún opnaði augun í morgun og þar til litla stýrið var lagt út af í kvöld. Hún tuðaði líka óspart yfir ýmsu sem fór í taugarnar á henni, mikil neikvæðni í gangi. En hún sofnaði ekkert í dag – rotaðist bara um leið og höfuðið snerti koddann í kvöld. Sefur vært og andar létt.

Sjálf er ég ekki mjög hraust í dag. Verulega mikið sljó, þokuð og slöpp, sérstaklega seinnipartinn. Tók baðið snemma í kvöld í von um að hressa mig við og geta unnið. Það virkaði aðeins – er samt mjög skýjuð í heilabúinu. DAAAAAUÐSYFJUÐ.

Matseðill dagsins

Morgunmatur: Kjúklingalæri (bara skinnið fyrir dóttur mína), soðin paprika og blómkál (hún fúlsar við blómkáli)

Hádegismatur: Kúrbítssúpa

Síðdegisbiti: Kjúklingaleggir (+ skinn) fyrir gikkinn (oftast er hún reyndar alls ekki gikkur...) og soðin, skræld, rauð paprika. Rest af blómkáli og engiferte fyrir mig.

Kvöldmatur: Kjúklingaleggir (að sjálfsögðu með skinni) og soðin gul og græn (!) paprika, ásamt með soðnum kúrbít (sem barnið fúlsar einnig við). Einnig kálfafillé.

Kjötsoð dagsins: ... er ekki alveg viss. Byrjaði að láta það malla í gærkvöldi og hélt þá að það væri nautabeinasoð. En það var frekar bragðlaust og var einhvern veginn frekar með keim af lambi. Er hreinlega ekki viss því ég er jú svo ringluð eitthvað, veit ekki úr hvaða poka í frystinum ég tók það. Þar að auki eru alls ekkert allir pokarnir frá kjötheildsölunni merktir, þannig að það er oft erfitt fyrir leikmann (-/konu!?!!) að átta sig.

Bað dagsins: Epsom

Dagur 5

2010-06-12T23:42:00.002Z

Ég var ekki nógu skipulögð í dag. Þreytu og slappleika að mestu um að kenna, held ég. Eftir Epsom-baðið á kvöldin hef ég verið svo spræk eitthvað og í stað þess að sofa fer ég að ganga í milljón hluti sem mér finnst áríðandi... enda svo á að fara seint að sofa. Hmmm...

Í gær fékk ég mér reyndar fyrstu súrkálssafateskeiðina fyrir háttinn. Veit ekki hvort það átti þátt í löngum og djúpum nætursvefninum, eða ekki.

Í morgun fékk ég mér teskeið af nýja súrkálinu mínu og ályktaði að það þyrfti kannski að fá að súrna í einn dag enn. Stelpan fékk teskeið af hinu, súrkáli sem ég gerði um daginn. Henni finnst safinn góður. Það er mikill léttir, það er þó eitthvað sem henni finnst gott. Gaf henni heila matskeið síðdegis. Sé ekki að það hafi nein sérstök áhrif til eða frá, enda er svosem erfitt að greina það. Það gæti aukið kláðann. Það gæti ýtt undir lystarleysið, gæti ýtt undir slappleikann, þungu lundina... eða eitthvað. Hver veit. Ætla allavega ekki að auka skammtinn hennar meira fyrst um sinn.

Ég fór í „bröns“ með vinkonum mínum. Þegar ein þeirra afboðaði sig undir þeim formerkjum að hún væri að fara í útskriftarveislu rifjaðist upp fyrir mér að ég væri sjálf að brautskrást úr mínu háskólanámi í dag. Þriðja gráðan í höfn og ég hafði engan hug á að mæta á þessa löngu og leiðinlegu útskrift, enda búin að mæta á nógu margar í gegnum tíðina (mínar eigin sem og annarra). Þannig að ég fór glöð í bröns. Barnapían var á djamminu í alla nótt og ég viðurkenni að ég hafði smá efasemdir þegar ég skildi börnin eftir hjá henni... en jæja, þetta var ekki langur tími.

Brönsinn var á Gló og þó að ég hafi ekki getað borðað neitt þar, þá hnusaði ég og nasaði og horfði og skoðaði, spurði, spáði og spekúleraði í það sem á boðstólum var. Það er frábært úrval af hráfæði þarna og megnið af því sem á annað borð heitir hráfæði er 100% „GAPS-löglegt“. Æðislegt! Ekki oft sem maður getur farið út að borða. Fékk mér reyndar humarsalat á kaffihúsi um daginn – það er það eina sem ég hef vogað mér síðan ég byrjaði á GAPS. Skeggræddi við kokkinn áður og fékk að vita öll smáatriði og hafa áhrif á nokkur vafaatriði. Það var allt í lagi með allt í salatinu, nema ólífuolían var hituð. Leyfði mér að taka sénsinn af því að ég vissi að hinn ægilegi Inngangur væri á næsta leyti... og að öll hugsanleg skaðleg áhrif myndu þar með skolast burt ;-)

Börnin sluppu í gegnum þynnkupössunina án sjáanlegs skaða og ég fór út með þá styttri í rúma klukkustund síðdegis. Sú lengri fékk að horfa á Latabæ því að hún hafði enga orku í rigninguna. Við höfðum bara opið út úr stofunni og ég fylgdist með þeim báðum.

Við komum inn um það leyti sem Latibær var búinn og sofnuðum allar í sófunum, alveg óvart. Mjög fyndið í raun, því undir venjulegum kringumstæðum sofnum við ekki bara si svona um miðjan dag (ja, eða síðdegis), allavega ekki allar í einu.

Þegar ég fann að litla krílið var sofnað í fanginu á mér og sá að sú eldri var að speisa út í næsta sófa fann ég hvað ég var gífurlega yfirkomin af þreytu og hugsaði með mér að það væri nú allt í lagi að dorma smá í 10 mínútur... vaknaði nærri klukkutíma síðar með dofinn og frosinn handlegg (enn opið út) en börnin sváfu sem steinar.

Það var eiginlega þetta sem setti dagskipulagið úr skorðum. Þegar við vöknuðum var eiginlega kominn kvöldverðartími og ég ekki búin að elda neitt – fór að reyna að gera allt í einu...

Til að gera langt mál stutt þá fékk sú styttri kvöldmat á undan hinni og var svo sett fyrir framan Brúðubílinn. Ég vil taka það fram að almennt horfa þessi börn mjög lítið á sjónvarp eða myndefni!!! Kannski stöku sinnum um helgar eða á veikindadögum, auk barnatímans á RÚV þegar þau muna eftir honum. Allajafna er reglan á þessu heimili að klukkustund sé hámarksskjátími dagsins. En... þegar slappleikinn er mikill og ég að reyna að gera milljón hluti... þá er myndefni life saver. Plús að það er, vegna lítillar notkunar almennt, smá sport fyrir þær, sem kemur sér mjög vel núna!

Og til að halda áfram með söguna þá fékk sú eldri stólpípu því aftur voru liðnar 48 stundir án hægða, sem er kannski ekki skrítið þegar hún borðar eins og mús. Svo fékk hún skinn af kjúklingabringum, sem er eiginlega það eina sem hún vill þessa dagana, ásamt með skrældri, soðinni, rauðri papriku. Og svo fékk hún engiferbað.

Þegar allt var búið var klukkan orðin tíu.

Ég sem ætlaði að vinna í kvöld.

Gengur bara betur næst...

Matseðill dagsins

Allt í belg og biðu og engar skipulagðar máltíðir... rest af kvöldmat gærdagsins (svínalundir og grænmeti) og svo meira grænmeti og slatti af kjúllalærum (aðallega skinnið fyrir barnið)...

Kjötsoð dagsins: Nautabeina

Bað dagsins: Engiferbað

Dagur 4

2010-06-11T22:19:00.002Z

Hvar á ég að byrja? Laaangur dagur.

Framan af var ég hressari og mér virtist stelpan mín líka vera að hjarna við. Þetta byrjaði semsagt vel.

Og þetta var svo sem ágætur dagur. Látum okkur sjá... fyrst horfði hún á DVD og ég vann, svo setti ég hana á dýnu út á stétt og leyfði henni að hlusta á sögu á geisladiski... svo aftur DVD seinni partinn og svo fórum við í bíltúr. Náðum í kjöt sem ég kaupi í heildsölu (aukaefnalaust) og svo í afa barnsins sem fór með henni heim á meðan ég náði í litlusystur í leikskólann og fór í búð. Svo var afinn hér fram yfir háttatíma, með stanslausa skemmtidagskrá fyrir börnin.

Þannig að þetta var ekkert svo slæmur dagur.

Góðu fréttirnar eru að ég er búin með stig 1 og gæti ótrauð fært mig yfir á stig 2 að öllu óbreyttu. Ég hélt aldrei að ég ætti eftir að blogga um eigin hægðir... en, hey... lít bara á þetta sem þroskamerki... Hægðir eru semsagt lykilatriði varðandi færslu á milli stiga. Og mínar voru semsagt með miklum ágætum í dag :-)

En dóttlan var lystarlaus og varð einhvern veginn máttlausari þegar leið á daginn. Útbrotin voru á rosalega góðri leið þegar hún vaknaði í morgun, en svo var hana eitthvað farið að klæja á ný undir kvöldið. Þannig að hér er nóg til að rugla rými.

Ég lofaði henni að færa mig ekki á stig 2 á undan henni. En ég veit samt ekki hvort ráðlegt er að bíða lengi - eða hversu lengi.

Annað sem hófst í dag: Sauerkrautsafi. Stelpan fékk teskeið en ég er ekki enn búin að taka minn af því að ég veit einfaldlega að hann slær mig út. Og ég þurfti að vinna í dag, mátti ekki við því að vera í kóma. En er að fara að taka teskeið núna og fer svo beint í Epsom-salt bað.

Það er eflaust góður leikur þegar ég er á annað borð tilbúin í stig 2.

Ég er annars búin að vera sljó og með mikinn einbeitingarskort seinni partinn. Ferlega ergilegt. Ég þarf að ljúka af verkefninu sem ég er að vinna við og það teygist bara og teygist og teygist, einhvern veginn.

Ég steinsofnaði á meðan kvöldmaturinn var að malla. Afinn var með uppeldið í sínum höndum og ég bara koxaði í sófanum. Vaknaði þegar ofninn tísti á mig til að láta vita að tíminn væri kominn (ég stillti kjötið á tíma).

Matseðill dagsins:

Morgunmatur: Maukuð gulrótar-, kúrbíts- og paprikusúpa
Hádegismatur: Kjúklingabringurest og soðin paprika og gulrót
Síðdegissnarl: Sama súpan og um morguninn
Kvöldmatur: Ofnsoðnar (í eigin vökva) svínalundir fyrir mig, litla barnið og afann og kjúllabringur fyrir GAPS-barnið þar sem hún vill þær frekar og mér er mjög í mun að koma einhverju ofan í hana!

Kjötsoð dagsins: Nautabeinasoð

Bað dagsins: Epsom

Dagur 3

2010-06-10T22:44:00.000Z

Váááááá hvað ég var slöpp í morgun. Skjálfhent, riðandi, andstutt, sortnaði fyrir augum þegar ég stóð upp... illt alls staðar... gersamlega að drepast í maganum...

En já. Dagurinn byrjaði víst kl. 5.00 en þá var kominn fótaferðatími fyrir þá eldri. Eftir að hafa fylgt henni á klósettið og gefið henni vatn og vöðvaverkjakrem (heimatilbúið, GAPS-löglegt) og hlustað á hana dæsa og bylta sér í klukkustund fór ég með henni inn í hennar herbergi og lét hana hlusta á leikrit (Vökuland). Fór sjálf aftur að sofa og svaf til 8.00 sem er afar, afar óvenjulegt á þessu heimili. En þá var það styttra stýrið sem vakti mig - hitt var þá sofnað aftur.

Nú... ég var eins og fyrr segir FÁRÁNLEGA slöpp. Lystarlaus en samt sísvöng, þjökuð og ergileg. Makaði mig alla út í vöðvaverkjakreminu sem til allrar hamingju virkar ljómandi. Dóttir mín (eldri) var líka hundslöpp.

Ég var að reyna að vinna, en gat engan veginn einbeitt mér. 5 mínútna verk tók mig svona klukkustund. Handónýt.

Mundi að á innganginum í fyrra fékk ég á spjallinu það góða ráð að borða helling af grænmeti til að fá orku. Þannig að ég borðaði og borðaði - hundvont og bragðlaust soðið grænmeti - og svei mér ef það hjálpaði ekki. Held líka að silungsafgangurinn sem ég borðaði síðdegis hafi hjálpað til.

Síðdegis þurfti ég að stússast, þurfti að fara á 5 mismunandi staði að erindast og það gekk bara slysalaust. Enn ansi slöpp... en hélt samt haus og svona.

Dóttir mín var ekki búin að hafa hægðir í a.m.k. 2 daga. Þannig að hún fékk stólpípu í dag. Eitt af inngangsráðunum er víst að vera ekki með innibyrgðar hægðir lengur en 36 klst. Þannig að þetta hefði alveg mátt gerast fyrr. Hún hefur tvisvar áður fengið stólpípu, í bæði skiptin eftir að við byrjuðum á GAPS. Í fyrri skiptin hefur hún staðið sig eins og hetja - í fyrsta skiptið var hún hreint út sagt í skýjunum og fannst þetta frábært...! En í dag var hún samt eitthvað lítil í sér, vatt sér undan og ég þurfti að beita mikilli lagni til að virkja hana til samvinnu. En svo gekk þetta vel. Nú vona ég bara að hún fari að fá matarlyst, svo að þetta fari að koma af sjálfu sér...

Morgunmatur dagsins: Smá soðið grænmeti frá því með kvöldmatnum í gær (paprikur auðvitað í aðalhlutverki)

Hádegisverður dagsins: Gulrótar- og paprikumauk

Síðdegisverður dagsins: Silungsrest og soðið brokkólí

Kvöldverður dagsins: Ofnsoðnar kjúklingabringur og grænmeti. Þar sem faðir barnanna eldaði kvöldmatinn og ég var ekki viðstödd fór óvart svo að laukur slæddist með grænmetinu. Það má víst ekki á stigi 1. Smá var komið ofan í mig áður en ég fattaði það - held að lítið hafi farið ofan í dóttur mína, en vona að ekki sé mikill skaði skeður.

Kjötsoð dagsins: Kjúklingaleggjasoð

Ég vil líka segja frá því að þetta tekur á andlega. Það er ömurlegt að vera svona slöpp eins og ég var í morgun og bæði fer það eitt og sér í skapið á manni og svo má reikna með því að þetta die off hafi líka áhrif á geðið. Stelpan mín er til dæmis búin að vera dálítið neikvæð á köflum í dag og í gær (og skyldi svosem engan undra). Í gær var ég rosa lipur og ljúf og hvetjandi og góð mamma og alveg á hjólum við að snúa nöldri yfir í bjartsýni og sjálfsvorkun í ánægju og snúast í kringum hana á alla kanta - en framan af deginum í dag varð ég vör við áþreifanlega afturför í umönnunar- og uppeldisfærni minni...

En það eru líka góðar fréttir í pakkanum. Öndunin hjá þeirri stuttu er allt önnur nú þegar. Og bólgna, skorpna, sprungna og blóðrisa exemhreistrið er óðum að hrynja af og undan er farið að glitta í heila, slétta og mjúka húð. En dálítið rauð og svolítið hreistruð víða, en samt, það er ómetanlegt að fá svona hvatningu þegar hlutirnir eru erfiðir.

Og svo að ég klári frásögn mína af deginum, um sjöleytið hitti ég 2 konur sem hafa áhuga á að byrja á GAPS og vildu fá ráð hjá mér. Ég spjallaði við þær í klukkustund og sagði þeim allt sem ég veit... sem er því miður ekki alveg allt... Eins og mín er von og vísa hamraði ég á INNGANGSFÆÐINU - það þýðir ekkert að taka nokkrar vikur eða mánuði á fullu GAPS-fæði, finna litlar eða engar breytingar og dæma það þá bara úr leik...!!! Hef nú þegar hitt fólk sem hefur sagt mér þannig sögur og mér finnst það geeeeðveikt ergilegt. Fólk sem er með krabba fer ekkert bara stundum í kímó og segir svo bara ,,ah, þetta virkaði ekkert..." - annað hvort gerir maður hlutina alveg eins og fyrir er lagt þegar heilsan er annars vegar, eða maður getur bara sleppt þeim.

En þetta var víst komið fram áður. Og ég vona svo sannarlega að þessum tveimur frábæru konum sem ég hitti í kvöld gangi þetta rosalega vel. Ég hlakka til að fá að fylgjast með.

Svo var brennókvöld í kvöld. Ég er ekki frá því að ástæðan fyrir því að mér sortnaði fyrir augum í morgun, í allavega einhver skiptin, hafi verið tilhugsunin um að skjögra í brennó í kvöld. En þegar loks kom að því var ég orðin talsvert miklu hressari. Smellti mér því galvösk í leikinn og neita því svosem ekki að ég var merkjanlega andstyttri og úthaldsminni en venjulega, en vá hvað þetta var samt gott. Algerlega frábært að hreyfa sig svona í frábæru veðri í frábæru íslensku súrefni... Mmmmmh....

Dagur 2

2010-06-09T22:06:00.000Z

Dagur 2 svo til liðinn.

Morgunmatur: Köld soðin paprika + gulrætur (rest frá því með kvöldmatnum í gærkvöldi)
Hádegismatur: Kúrbíts-, papriku- og kjötsoðssúpa
Kvöldmatur: Ofnsoðinn silungur með soðnu grænmeti (papriku og gulrótum)

Kjötsoð dagsins: Restin af nautabeinasoðinu frá því í gær framan af og kjúklingabeinasoð seinni partinn.

Baðsalt dagsins: Epsom

Líðan mín: Sæmileg eftir atvikum. Talsvert máttleysi, utanviðmigheit og svimi. Magaverkir.

Líðan dóttur minnar: Öllu verri. Yfirgengilegt máttleysi og lystarleysi. Svaf frameftir í morgun (sem er mjög ólíkt henni) og í nærri 4 klst samfleytt í dag. Gubbaði kvöldmatnum. Sefur uppi í hjá mér í nótt.

Dóttir mín hefur þar að auki verið frekar þyrst. Ég er að reyna að finna út hvað er óhætt að gefa henni á þessum tímapunkti (samkvæmt fæðuútlínunum) til að fyrirbyggja ofþornun. Veit ekki hvort saltlausn með sítrónusafa er í lagi, fólk talar um það á vefnum, en skv. inngangsferlinu er ferskur ávaxtasafi ekki í boði strax... spurning hvort sérstaða sítróna (basísk náttúra og allt það) gerir þær nógu spes til að vera undanþága...?

Inngangsferli, dagur 1

2010-06-08T22:12:00.000Z

Jæja, þá er ég mætt til leiks af fullum krafti. Í dag er dagurinn sem við höfum beðið eftir í rúma 9 mánuði, eða frá því að skólinn hófst hjá eldri dóttur minni í haust. Í dag byrjuðum við á Inngangsferli GAPS.

Aðeins um söguna okkar áður en ég held lengra.

Ég: Tveggja barna móðir. Hef megnið af ævinni glímt við alls konar heilsufarsvandamál og fengið ófáar misgáfulegar „greiningar“ í gegnum tíðina. Meðal greininga má nefna vöðvabólgu, vefjagigt, síþreytu, Angioedemu, Ehlers Danlos, þunglyndi, Endometriosis, myglusveppaofnæmi og Raynaud's syndrome. Fékk líka á tímabili auðveldlega nýrnasýkingar. Athugið að þetta er ekki tæmandi listi, bara eitthvað sem ég man núna... og minnið er satt að segja ekki upp á marga fiska. Svo má bæta því við að ég var sl. vor komin með óþol fyrir þónokkrum fæðutegundum.

Dóttir mín: Er á yngsta stigi grunnskóla. Var með verulega svæsið tilfelli ungbarnakveisu, grét út í eitt fyrstu mánuðina - allan og ég meina allan sólarhringinn, ekki bara í kortér á kvöldin eins og sum þessara barna sem nefnd eru „kveisubörn“. 8 mánaða greindist hún með eggjaofnæmi sem af og til hefur átt að vera farið, skv. rannsóknum lækna, en samt fékk hún alltaf útbrot um leið og egg fór inn fyrir hennar varir. Fljótlega kom heiftarlegt óþol fyrir mjólkurvörum einnig í ljós og svo bættust fæðutegundirnar við ein og ein í einu... þar til sl. vor að þær voru orðnar 11 talsins og flestar frekar algengar. Helstu einkenni hjá henni voru þá sífelldir magaverkir, vatnskenndar hægðir, astmaöndun, kæfisvefn á lífshættulegu stigi, illviðráðanleg húðútbrot og verulega mikil vanlíðan og skapbrigðaköst. Síðastliðið vor fékk hún svo greininguna „á einhverfurófinu.“

Við höfðum reynt ansi margt. Móðir mín var dugleg að fara með mig til lækna þegar ég var barn og til að gera langt mál stutt og ýfa sem fæstar fjaðrir er óhætt að segja að árangur hafi verið með minna móti. Á fullorðinsárum hef ég reynt ólíkustu aðferðir til að bæta heilsu mína. Alls kyns kúrar og mataræðistilbrigði, meðferðir, meðhöndlanir, kraftaverkalyf og -tæki og svo mætti lengi telja - bæði innan sem utan hefðbundinna lækninga. Sumt hjálpaði eitthvað, annað ekki. Eftir að dóttir mín fæddist má segja að ég hafi verið stöðugt á höttunum eftir einhverju sem gæti hjálpað henni. Ég bjó að því að hafa sjálf reynt ýmislegt og gat því strikað eitt og annað út af listanum. Síðustu ár höfum við sett heilnæma fæðu í algeran forgang, mikið til lífræna - og vitanlega lausa við allar þær fjölmörgu fæðutegundir sem við þoldum ekki.

Hvað gerðist:

17. júlí í fyrra byrjuðum við á GAPS fæði. Eitt hef ég lært af öllum tilraunum mínum til að ná betri heilsu: Hálfkák dugar ekki. Annað hvort verður maður að fylgja leiðbeiningum til hins ýtrasta - og vita þá þegar upp er staðið að viðkomandi aðferð annað hvort virki eða ekki - eða maður getur bara sleppt þessu.

Þannig að ég lét dætur mínar báðar, sem og sjálfa mig, samviskusamlega á inngangsfæðið, sem greint er frá á vefnum og enn betur í bókinni The GAPS guide. Áhrifin létu ekki á sér standa, máttleysi, svimi, uppköst og þar fram eftir götunum. Ég var ekki búin að kaupa mér bókina (The GAPS guide) og vissi því ekkert hverju ég átti von á. Hringdi í mína helstu ráðgjafa (sem ekki hafa persónulega reynslu af GAPS) og þeir voru sammála um að við hefðum ábyggilega bara nælt okkur í flensu. Eftir tvo gubbudaga var inngangsferlið blásið af og skipt yfir í fullt GAPS fæði. Hið undarlega var þó að eftir aðeins þessa tvo daga andaði eldri dóttir mín létt sem vorgolan jafnt að nóttu sem degi, útbrotin voru horfin, skapið var jafnt og andleg líðan með sóma.

Nokkrum dögum og heilmikilli rannsóknarvinnu síðar gerðum við því aðra atrennu. Eftirgrennslanir mínar bentu til þess að um hefði verið að ræða „die off“ (ferlið þegar óæskilegar örverur / sníkjudýr deyja og sleppa frá sér eiturefnum út í líkamann). Þannig að við lögðum upp á ný og í þetta sinn náðum við þónokkrum árangri. Eftir rúma viku var ferlið þó blásið af á ný, í þetta sinn vegna aðkallandi afmælisveislu. Þess ber þó að geta að áður en það var gert smakkaði eldri dóttir mín linsoðið egg og varð í fyrsta sinn á ævinni ekki meint af. Hún hefur eins og nærri má geta hámað þau í sig æ síðan.

Til að gera langt mál stutt gerðum við eina enn atrennu í inngangsferlið áður en skólinn skall á. Skömmu síðar áttum við foreldrarnir fund með skólasálfræðingnum sem taldi sennilegt að einhverfurófsgreiningin ætti ekki lengur við, slík var breytingin á barninu.

Í vetur höfum við verið á fullu GAPS fæði og líðan okkar hefur hreinskilnislega sagt verið upp og ofan. Einkum hafa útbrot eldri dóttur minnar ágerst eftir því sem liðið hefur á vorið. Ég hef verið í sambandi við annað fólk sem einnig er á GAPS sem hefur upplýst mig um að allt sem við höfum gengið í gegnum sé eðlilegt. Ég er enn fremur sannfærðari en nokkru sinni fyrr um að ekki dugi neitt hálfkák, nú tökum við inngangsferlið með trompi og bregðum ekki tommu frá bókinni.

Læt þess þó getið að hin stelpan mín er stikkfrí í bili. Hún hefur átt við heilsufarsvandamál að etja sem ég hef enga skýringu fundið á enn og því er hún bara á fullu GAPS-fæði.

Maturinn í dag samanstóð af nautabeinasoði (með öllum máltíðum), soðinni papriku (morgunmatur), blómkáls- og paprikusúpu (hádegismatur), gulrótar- og paprikumauki (síðdegis) og ofnsoðnum kjúklingaleggjum með blönduðu soðnu grænmeti (þ.m.t. papriku!) í kvöldmat. Já, dóttur minni finnst paprika semsagt skásta soðna grænmetið. Og trikkið til að fá hana til að drekka kjötsoðið (sem hún hatar meira en pestina) er loforð um Tívolí í Køben síðar í sumar. Það virkaði allavega mjög hvetjandi í dag.

Annars var ég mikið til að vinna og hún ýmist að skottast úti við, lesa bók eða glápa á DVD (samt ekki of mikið, bara 1 mynd og 1 þátt).

Undanfarið hef ég verið talsvert slöpp og með einum of þráláta heilaþoku og hvoru tveggja margfaldaðist í dag. Sú stutta var líka orðin ansi framlág undir kvöldið og það vessaði úr útbrotunum hennar.

Við sjáum hvað setur. Ég vona að ég verði nógu hress á morgun til að halda áfram að skrásetja ferlið.

Róleg byrjun

2010-04-20T18:23:00.000Z

Það verður ekki sagt að ég byrji þetta blogg með offorsi.

Ef einhver dettur hér inn af forvitni um GAPS mataræði og lífsstíl vil ég benda á að það er ansi virkur hópur á Facebook sem heitir GAPS á Íslandi - A GAPS diet support group in Iceland.

Annars vonast ég til að geta sett hér síðar meir inn upplýsingar sem geta átt erindi við alla sem vilja forðast aukaefni í matvælum og hafa umhverfi sitt eiturefnalaust.

Heilsan okkar

2009-11-21T08:55:00.000Z

Þetta er allra, allra fyrsta færslan... eiginlega bara til að prófa.

Markmiðið er að fjalla um GAPS - segja sögu mína og dætra minna, hvernig ég hef tekist á við veikindi okkar, hvernig við rákumst á GAPS, hvað við erum að gera og hvernig við tökumst á við lífið með GAPS.

GAPS stendur fyrir Gut and psychology syndrome, sem í beinni þýðingu væri ,,meltingarvegs- og geðheilsu-heilkenni"...?! Allavega, lykilbókin er til í íslenskri þýðingu, sjá hér: www.maturogheilsa.is